قازاقستاندا ۋاقىتشا تۇرۋعا 314 مىڭنان استام شەتەلدىككە رۇقسات بەرىلدى
12:54, 07 - قىركۇيەك 2023
استانا. قازاقپارات - جىل باسىنان 314 مىڭنان استام شەتەلدىك قازاقستاندا ۋاقىتشا تۇرۋعا رۇقسات الدى. بۇل تۋرالى ىشكى ىستەر مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.
«2023 -جىلى 314741 شەتەلدىك ازامات قازاقستاندا ۋاقىتشا تۇرۋعا رۇقسات الدى. ولاردىڭ ىشىندە وزبەكستاننان – 212445 ، رەسەيدەن – 68743، قىرعىزستاننان - 12119 تاجىكستاننان - 9066 ادام»، - دەلىنگەن اگەنتتىكتىڭ رەسمي ساۋالىنا بەرىلگەن جاۋاپتا.
وسى ورايدا مينيسترلىك اتالعان شەتەلدىك ازاماتتاردىڭ ەلىمىزدە قانداي قىزمەت سالالارىندا جۇمىس ىستەيتىندىگىنە قاتىستى ەسەپ جۇرگىلمەيتىنىن اتاپ وتەدى.
سونىمەن قاتار ۆەدومستۆو وزگە ەل ازاماتتارى ەڭ كوپ ورنالاسقان وڭىرلەردى اتادى. ۇسىنىلعان دەرەككە سايكەس، الماتىدا – 54260، اتىراۋ وبلىسىندا – 43314، الماتى وبلىسىندا – 26679، ماڭعىستاۋ وبلىسىندا – 26280، استانا قالاسىندا 25588 شەتەلدىك تۇرىپ جاتىر.
اۆتور:
مارلان جيەمباي