قارۋلى كۇشتەردىڭ سپورتشىلارى 30 رەت وليمپيادا ويىندارىنىڭ جەڭىمپازى مەن جۇلدەگەرى اتانعان

استانا. قازاقپارات - قازاقستان قارۋلى كۇشتەرىندە سپورت كۇنى اتالىپ ءوتتى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

سپورتپەن شۇعىلدانۋ - اسكەري قىزمەتشىلەردىڭ جاۋىنگەرلىك دايارلىعىنىڭ اجىراماس بولىگى. ول ادام بويىندا كۇشتى، جىلدامدىقتى، توزىمدىلىكتى دامىتۋعا، جاۋىنگەرگە قاجەتتى ەرىك-جىگەردى تاربيەلەۋگە باعىتتالعان.

ق ر قورعانىس مينيسترلىگىنىڭ سپورت كوميتەتى - ورتالىق سپورت كلۋبى قارۋلى كۇشتەردىڭ جوعارى حالىقارالىق دارەجەدەگى سپورتشىلارىن دايىندايدى.

«قازىرگى كەزدە سپورت پەن سالاۋاتتى ءومىر سالتى ەكونوميكالىق دامۋمەن قاتار ازاماتتاردىڭ ءومىر ءسۇرۋ ساپاسىنىڭ نەگىزگى كورسەتكىشتەرىنىڭ ءبىرى. سپورت پاتريوتيزم مەن جالپى ۇلتتىق بىرلىك نەگىزدەرىن قالىپتاستىرۋداعى ماڭىزدى اسپەكت. اسكەري سپورتشىلار جانكۇيەرلەرىن كەرەمەت ويىندارمەن جانە رەكوردتارمەن تالاي رەت قۋانتىپ كەلەدى. سپورت ءومىرىنىڭ اجىراماس بولىگىنە اينالعان بارلىق ادامداردى قۇتتىقتايمىن. ولارعا زور دەنساۋلىق، جاۋىنگەرلىك رۋح جانە جاڭا جەتىستىكتەر تىلەيمىن»، - دەدى قورعانىس مينيسترلىگىنىڭ سپورت كوميتەتىنىڭ ءتوراعاسى - ورتالىق سپورت كلۋبىنىڭ باستىعى پودپولكوۆنيك ارمان ابەۋوۆ.

تاۋەلسىزدىك جىلدارىندا قارۋلى كۇشتەردىڭ سپورتشىلارى 30 رەت وليمپيادا ويىندارىنىڭ جەڭىمپازدارى مەن جۇلدەگەرلەرى اتاندى، الەمدىك بىرىنشىلىكتەردىڭ 536 التىن، 359 كۇمىس جانە 421 قولا مەدال، ەۋروپا مەن ازيا كونتينەنتتىك جارىستارىنىڭ 1800 دەن استام مەدال جەڭىپ الدى. 2500 دەن استام رەت ت م د چەمپيوندارى اتاندى. 1992 -جىلدان باستاپ 10 مىڭنان استام اسكەريلەر ەل چەمپيونى اتاعىنا يە بولدى.

سپورت كوميتەتى قىزمەت بارىسىندا مادەنيەت جانە سپورت مينيسترلىگىمەن، ۇلتتىق وليمپيادا كوميتەتىمەن، سپورت تۇرلەرى بويىنشا قازاقستان فەدەراتسيالارىمەن جانە باسقا دا قوعامدىق سپورت بىرلەستىكتەرىمەن تىعىز بايلانىستا. تمد جانە الىس شەت ەلدەردىڭ حالىقارالىق سپورت ۇيىمدارىمەن جاڭا ىسكەرلىك بايلانىستار ورناتۋ بويىنشا تۇراقتى جۇمىس جۇرگىزەدى.

200 دەن استام اسكەري سپورتشى ءارتۇرلى سپورت تۇرلەرىنەن قازاقستان قۇراما كوماندالارىنىڭ مۇشەسى، سونداي- اق وليمپيادا ويىندارىنا بەلسەندى دايىندىق جۇرگىزەدى. 2019 -جىلى قىتايدىڭ ۋحان قالاسىندا دۇنيەجۇزىلىك اسكەري ويىندار ءوتتى. اتالعان سايىسقا 109 ەلدەن 9,3 مىڭنان استام سپورتشى قاتىستى. مەدالدار ەسەبىنىڭ كەستەسىنە سايكەس قازاقستان قارۋلى كۇشتەرىنىڭ قۇراماسى جالپى كوماندالىق ەسەپتە 12-ورىنعا يە بولدى.

دۇنيەجۇزىلىك اسكەري ويىندارىندا كومانداعا التىن مەدالداردى جەڭىل اتلەتشى مايور ولگا رىپاكوۆا، تاەكۆوندوشى لەيتەنانت رۋسلان جاپاروۆ، بوكسشىلار تەمىرتاس ءجۇسىپوۆ پەن اسلانبەك شىمبەرگەنوۆ اكەلدى. سونداي-اق، قارۋلى كۇشتەر قۇراماسىندا ءۇش كۇمىس جانە بەس قولا مەدال بولدى.

وليمپيادا ويىندارىنىڭ تاريحىندا التىن ارىپتەرمەن جازىلعان باسكەتبولدان اتاقتى ارميا چەمپيوندارى - ءالجان جۇرمۇحامەدوۆ (ميۋنحەن ق. , 1972 ج.) جانە ۆالەريي تيحونەنكو (سەۋل ق. , 1988 ج.)، اۋىر اتلەتشى اناتولي حراپاتوي (سەۋل ق. ، 1988 ج.)، شاڭعىشى ۆلاديمير سميرنوۆ (ليللەحاممەر ق. ، 1994 ج. ) ، بوكسشىلار ۆاسيلي جيروۆ (اتلانتا ق. ، 1996 ج. )، ەرماحان يبرايموۆ (سيدنەي ق. , 2000 ج. )، سەرىك ساپيەۆ (لوندون ق. ، 2012 ج. ) جانە جەڭىل اتلەتشى ولگا شيشيگينا (سيدنەي ق. ، 2000 ج. ) مەن ولگا رىپاكوۆا (لوندون ق. ، 2012 ج. ).