شەتەلدىك تۋريست قىزدىڭ سىنىنان كەيىن اسى ۇستىرتىنەن 30 توننا قوقىس شىعارىلدى

قونايەۆ. قازاقپارات - اسى ءۇستىرتى اۋماعىندا دەمالۋشىلاردىڭ كوبى ورىندارىن جينامايدى. كۇل- قوقىستارىن سول كۇيى تاستاپ كەتەدى، دەپ حابارلايدى قازاقپارات ءتىلشىسى.

الەۋمەتتىك جەلىدە شەتەلدىك تۋريست تانىمال اسى ۇستىرتىندە شاشىلىپ جاتقان قوقىستى جاريالاعان بولاتىن.

«اسى ءۇستىرتى - سىزدەردىڭ ەلىڭىزدىڭ ءىنجۋ- مارجانى، ءبىراق بۇل جەرلەردى شوشقا قورا سياقتى ۇستاساڭدار، تۋرلارىڭنان نە پايدا؟ جۇمىس كۇندەرى تازالاۋعا بارىپ، بىرنەشە دارەتحانا ورناتۋعا بولادى عوي ؟ سىزدەر وسى تابيعات اياسىنا كوپ ادام اپاراسىزدار، دەمالىس كۇندەرى بۇل جەرگە 1000-1500 ادام جينالادى، شىنىمەن دە جينالىپ، بۇل ماسەلەلەردى شەشۋ مۇمكىن ەمەس پە؟» ، - دەپ سۇرادى شەتەلدىك تۋريست قىز.

الماتى وبلىسىنىڭ اكىمدىگى اسى قىراتىنىڭ اۋماعىندا كەمپينگتەر ورناتۋ بويىنشا تۇراقتى تۇردە ءىس- شارالار جۇرگىزىلىپ جاتقانىن حابارلادى.

«دەمالىس كۇندەرى 11-13-تامىز ارالىعىندا اۋقىمدى تۋر ۇيىمداستىرىلدى. بۇل تابيعاتتىڭ لاستانۋىنا اكەلدى. 15-تامىزدا تۋريستەر قالدىرعان قوقىستاردى تازالاۋ ماقساتىندا ەڭبەكشىقازاق اۋدانىنىڭ اكىمدىگى «ىلە الاتاۋ» مەملەكەتتىك ۇلتتىق ساياباعىنىڭ وكىلدەرىمەن بىرلەسىپ سەنبىلىك وتكىزدى. اتالعان شاراعا 43 مىڭ ادام تارتىلدى. ناتيجەسىندە 28 توننا قوقىس شىعارىلىپ، بارلىق اۋماق تازارتىلدى»، - دەپ ءتۇسىندىردى وبلىس اكىمدىگىنىڭ باسپا ءسوز قىزمەتى.

اسى ءۇستىرتى كىشى تۇرگەن وزەنىنەن باستاۋ الىپ، 60 شاقىرىم جەرگە سوزىلىپ جاتىر. ءۇستىرت 2800-3200 مەتر بيىكتىكتە ورنالاسقان.