يندۋستريا ءمينيسترى قىتايدىڭ 30 عا جۋىق كومپانياسىنىڭ وكىلدەرىمەن ىسكەرلىك كەزدەسۋ وتكىزبەك

استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى مارات قارابايەۆ باستاعان ەلىمىزدىڭ دەلەگاتسياسى رەسمي ىسساپارمەن قىتاي حالىق رەسپۋبليكاسىنا بارىپ، بىرنەشە سالا بويىنشا ەكىجاقتى ارىپتەستىكتى دامىتۋدىڭ جولدارىن تالقىلادى.

بۇل تۋرالى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى.

ءباسپاسوز قىزمەتىنىڭ حابارلاۋىنشا، اتالعان ساپار مەملەكەت باسشىسى قاسىم- جومارت توقايەۆتىڭ قازاقستان مەن قىتاي اراسىندا ساۋدا- ەكونوميكالىق بايلانىستى نىعايتۋ جونىندەگى تاپسىرماسىن ىسكە اسىرۋ اياسىندا ءوتىپ جاتقانىن ايتا كەتكەن ورىندى.

ق ر ي ي د م باسشىسى باستاپ بارعان قازاقستاندىق دەلەگاتسيانىڭ قۇرامىندا ءبىرقاتار وبلىس اكىمدەرى، Kazakh Invest ۇلتتىق كومپانياسى مەن «قازاقستاننىڭ دامۋ بانكى» ا ق- نىڭ باسشىلارى، سونداي- اق 180 گە جۋىق وتاندىق كومپانيانىڭ وكىلدەرى بار.

كورشىلەس مەملەكەتتىڭ رەسمي وكىلدەرى مەن بيزنەس كومپانيالاردىڭ قاتىسۋىمەن ۇيىمداستىرىلعان ىسكەرلىك كەزدەسۋدە مارات كارىمجان ۇلى قازاقستاننىڭ ينۆەستيتسيالىق تارتىمدىلىعىن ارتتىرۋ بويىنشا اتقارىلىپ جاتقان جۇمىستار تۋرالى ايتىپ بەردى.

«قازىر ق ح ر- مەن ءوزارا بايلانىستى نىعايتۋ ءۇشىن ونەركاسىپ وندىرىسىنە باسىمدىق بەرىلگەن. مىسالى، ءبىز ماشينا جاساۋ مەن تاۋ- كەن سالاسىندا ءبىرشاما جەتىستىككە قول جەتكىزدىك.

سونداي- اق قىتايدان ەۋروپاعا جۇكتەردى تاسۋ ءۇشىن ترانسكاسپي حالىقارالىق كولىك ءدالىزىن دامىتىپ جاتىرمىز. وسى ماقساتتا ەلىمىزدىڭ اۋماعىندا بىرنەشە ءىرى ينفراقۇرىلىمدىق جوبانى ىسكە اسىرۋ قاجەت»، دەدى مينيستر.

ونەركاسىپ باعىتىنا سايكەس قازىر جالپى قۇنى 16 ميلليارد دوللارعا 57 بىرلەسكەن جوبا قولعا الىنعان. ال ىسكە اسىرىلعان جوبانىڭ سانى - 16 (قۇنى 4,4 ميلليارد دوللار) . ونىڭ ىشىندە شىنى وندىرىسىنە، Shandong Lovol تراكتورلارىن قۇراستىرۋ مەن Youtong Bus اۆتوبۋستارىن شىعارۋعا بايلانىستى بىرلەسكەن جوبالار قامتىلعان. ودان باسقا قازىر قۇنى شامامەن جارتى ملرد دوللاردىڭ 9 جوباسى جۇزەگە اسىرىلىپ جاتىر. تاعى قوسىمشا قۇنى 11 ميلليارد دوللارعا جەتەتىن 32 جوبانى جۇزەگە اسىرۋ تەتىكتەرى پىسىقتالىپ جاتىر.

بەيجىڭگە جاساعان ساپارىندا ق ر ي ي د م باسشىسى Shanghai Delong Steel Group كومپانياسىنىڭ وكىلدەرىمەن كەزدەسىپ، تاۋ- كەن سالاسىندا ءوزارا ءتيىمدى قارىم- قاتىناستى ارتتىرۋدىڭ ماسەلەلەرىن تالقىلادى. بۇل كومپانيا ق ح ر- دا ءىرى مەتاللۋرگيالىق كومپانيالاردىڭ قاتارىنا كىرەتىنىن ايتا كەتەيىك. Shanghai Delong Steel Group باسشىلارى ەلىمىزدە بىرلەسكەن جوبالاردى ىسكە اسىرۋعا ىنتالى ەكەندەرىن جەتكىزدى.

سونىمەن بىرگە م. قارابايەۆ كۇن باتارەياسىنىڭ وندىرىسىمەن اينالىساتىن Dahua كومپانياسىنىڭ وكىلدەرىمەن كەزدەستى. ەكىجاقتى اڭگىمەنىڭ بارىسىندا ەلىمىزدە بالاما ەنەرگيا كوزدەرىن دامىتۋ جولدارى قارالدى. بۇدان كەيىن ق ر يندۋستريا جانە ينفراقۇرىلىمدىق دامۋ مينيسترىمەن China Railway Highspeed كومپانياسىنىڭ باسشىلارى كەزدەسۋگە مۇمكىندىك الىپ، ونىڭ بارىسىندا تەمىرجول كولىگى ونەركاسىبىنە بايلانىستى ىنتىماقتاستىقتى نىعايتۋ ماسەلەلەرى قاراستىرىلدى. بۇدان باسقا ۆەدومستۆو باسشىسى ەلەكترموبيلدەردى شىعارۋمەن تانىمال Zeekr كومپانياسىنىڭ باسشىلارىمەن دە كەزدەسىپ، قازاقستاندا اۆتوكولىك وندىرىسىنە بايلانىستى بىرلەسكەن جوبانى قولعا الۋدىڭ مۇمكىندىكتەرى پىسىقتالدى.

تۇتاستاي العاندا، ءمينيستردىڭ ۇشكۇندىك ساپارى كەزىندە 30 عا جۋىق قىتايلىق كومپانيانىڭ وكىلدەرىمەن ىسكەرلىك كەزدەسۋلەر وتكىزىلىپ، سونداي- اق ەكى ەلدىڭ كاسىپكەرلەرى B2B فورماتىنا سايكەس ءوزارا ءتيىمدى قاتىناستى كەڭەيتۋدىڭ تەتىكتەرىن تالقىلايدى دەپ جوسپارلانعان.