بۇل تۋرالى ق ر ىشكى ىستەر ءمينيسترىنىڭ ورىنباسارى مۇرات بايمۇقاشيەۆ ءمالىم ەتتى، دەپ حابارلايدى قازاقپارات ءتىلشىسى.
«وتكەن جىلى قازاقستانعا كەلەتىن شەتەل ازاماتتارى ءۇشىن تىركەۋ ءراسىمى الىنىپ تاستالدى. دەگەنمەن ءبىز باقىلاۋدى توقتاتقان ەمەسپىز. بۇگىندە ەلگە كەلگەن شەتەلدىك قوناق تۋرالى ۆيزا پورتالى نەمەسە «e -Qonaq» جۇيەسى ارقىلى كوشى-قون قىزمەتى حابار بەرىپ وتىرادى. سونداي-اق، قازاقستاندا زاڭسىز ەڭبەك ميگرانتتارىمەن كۇرەستە 2014-جىلدان باستاپ ەنگىزىلگەن جۇيە ءوز جەمىسىن بەرىپ جاتىر. ياعني، اتالعان جىلدان باستاپ جەكە تۇلعالارعا ەلىمىزدە جۇمىس ىستەۋگە پاتەنت بەرىلە باستادى. وسى جىلدار ارالىعىندا ەڭبەك ميگرانتتارىنا 2 ميلليوننان استام پاتەنت بەرىلدى جانە قايتا ۇزارتىلدى. جانە بيۋجەتكە 30 ميلليارد تەڭگەگە جۋىق سالىق ءتۇستى»، - دەدى مۇرات بايمۇقاشيەۆ ق ر پارلامەنتى ماجىلىسىندە جاساعان بايانداماسىندا.
ونىڭ ايتۋىنشا، مينيسترلىكتىڭ دىتتەگەن ماقساتى - قازاقستاندىق جانە شەتەل ازاماتتارى قۇقىعىنىڭ بۇزىلماۋى.
«ودان بولەك، 2017-جىلى ەنگىزىلگەن زاڭناماداعى تۇزەتۋلەر شەتەلدەن كەلگەن ازماتتاردى ەسەپكە الۋ مەن ولاردىڭ كوشى-قون پروتسەسىنە باقىلاۋدى كۇشەيتۋگە مۇمكىندىك بەردى. سول سياقتى حالىقتىڭ ىشكى قونىستانۋىنىڭ ناقتى كورىنىسىنە قول جەتكىزدىك. ول ءوز كەزەگىندە قالا، اۋدانداردى دامىتۋدا وبەكتيۆتى جوسپارلاۋعا، جولاۋشىلار تاسىمالى اعىنىن انىقتاۋعا وڭ اسەرىن تيگىزدى. جانە دەنساۋلىق ساقتاۋ، ءبىلىم بەرۋ جانە باسقا دا حالىققا ارنالعان قىزمەتتەر ءۇشىن ەلىمىزگە قانشا ادامنىڭ كەلىپ، كەتىپ جاتقانى ماڭىزدى»، - دەيدى ول.
بۇعان دەيىن حابارلاعانىمىزداي، بۇگىن ق ر پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىندە ق ر كەيبىر زاڭنامالىق اكتىلەرىنە حالىقتىڭ كوشى-قونى سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىنىڭ تانىستىرىلىمى ءوتتى.