قاسىم-جومارت توقايەۆ ەل تاۋەلسىزدىگىنىڭ 30 جىلدىق مەرەيتويىنا ارنالعان سالتاناتتى جيىنعا قاتىستى
قازاقستان پرەزيدەنتى بارشا قازاقستاندىقتى ەل تاۋەلسىزدىگىنىڭ مەرەيتويىمەن قۇتتىقتاپ، جينالعان قاۋىم الدىندا ءسوز سويلەدى.
قاسىم-جومارت توقايەۆ سويلەگەن سوزىندە قازاق مەملەكەتتىلىگىنىڭ عاسىرلار بويعى تاريحىنىڭ ەڭ ماڭىزدى كەزەڭدەرىنە، تاۋەلسىزدىك العان ساتتەن باستاپ قازاقستاننىڭ الەۋمەتتىك-ەكونوميكالىق، سىرتقى ساياسي، مادەني، عىلىمي سالالارداعى ماڭىزدى جەتىستىكتەرىنە نازار اۋداردى.
تۇڭعىش پرەزيدەنت - ەلباسى نۇرسۇلتان نازاربايەۆتىڭ ەگەمەن قازاقستاندى قۇرۋ ىسىندەگى ەرەن ەڭبەگىنە ارنايى توقتالدى.
- تاۋەلسىزدىكتىڭ وتىز جىلى - تۇتاس ءبىر ءداۋىر. بۇل - قيىندىقتار مەن سىناقتاردى تاباندى تۇردە ەڭسەرۋ ءداۋىرى، تار جول، تايعاق كەشۋمەن سالىستىرۋعا بولاتىن ۇزاق كەزەڭ. بۇل - حالقىمىزدىڭ تاريحىندا بەتبۇرىس بولعان جاسامپازدىق ءداۋىرى. سوندىقتان ەل ازاماتتارىنىڭ اتىنان نۇرسۇلتان ءابىش ۇلى نازاربايەۆقا تاۋەلسىز قازاقستاندى قۇرۋداعى ەرەن ەڭبەگى ءۇشىن شىن جۇرەكتەن العىس ايتامىن، - دەدى مەملەكەت باسشىسى.
قاسىم-جومارت توقايەۆ تاۋەلسىزدىكتى نىعايتۋعا ۇلەس قوسقان بارشا وتانداسىمىزعا العىس ايتتى.
- ەڭسەلى ەل بولۋىمىزعا بارلىق سالانىڭ، ءتۇرلى ماماندىقتىڭ وكىلدەرى جانە بارشا ازاماتتارىمىز ءبىر كىسىدەي اتسالىستى. تۇپتەپ كەلگەندە، تاۋەلسىزدىكتى نىعايتۋ دەگەنىمىز - ەلگە پايداسى تيەتىن ناقتى جۇمىستاردى جۇزەگە اسىرۋ. قازاقستان سىزدەردىڭ جاسامپاز ەڭبەكتەرىڭىزدىڭ ارقاسىندا زور جەتىستىككە جەتتى. مەن وسى مەرەيلى ساتتە تاۋەلسىزدىگىمىزدى نىعايتۋعا قوسقان ۇلەسى ءۇشىن ءدۇيىم جۇرتقا العىس ايتامىن، - دەدى پرەزيدەنت.
پرەزيدەنت الداعى كەزەڭگە ارنالعان جوسپارلار تۋرالى ايتا كەلە، ەلىمىزدى ودان ءارى دامىتۋدىڭ باسىم مىندەتتەرىنە توقتالدى.
- ەندى الدىمىزدا بولاشاقتىڭ ەكونوميكاسىن جەدەل قۇرۋ مىندەتى تۇر. ونىڭ نەگىزىن جاڭا تەحنولوگيالار، جاساندى ينتەللەكت، جوعارى ەڭبەك ونىمدىلىگى جانە شىعارماشىلىق باستاما قۇرايدى. بۇل جۇمىستاردى اتقارۋدا جاستار شەشۋشى ءرول اتقارۋى كەرەك. مەملەكەت قوعامداعى كونسترۋكتيۆتى ديالوگ پەن ىنتىماقتاستىقتى ماقساتتى تۇردە دامىتا وتىرىپ، ءارقاشان جاۋاپتى ازاماتتارعا ارقا سۇيەيدى. ءبىز دايەكتى ساياسي جاڭعىرۋ ۇدەرىسىن جالعاستىرا بەرەمىز، ءبىراق الەۋمەتتىك انتاگونيزمگە، پوپۋليزمگە، ىشكى جاعدايدىڭ تۇراقسىزدانۋىنا جول بەرمەيمىز. ەلىمىزدە ۇيلەسىم مەن ءتارتىپتىڭ بەرىك ارقاۋى رەتىندە زاڭ ۇستەم قۇرۋعا ءتيىس. ەكولوگيانى جاقسارتۋ الداعى ونجىلدىقتاعى مەملەكەتتىك ساياساتتىڭ نەگىزگى باسىمدىعى بولادى. قازاقستان سيفرلىق تەحنولوگيانى ەنگىزۋ ءىسىن جان-جاقتى كۇشەيتەدى. ءبىز قوعامدا ىسكەرلىك رۋحى مەن تاجىريبەسىن ودان ءارى كۇشەيتۋدى سوزبەن ەمەس، جاسامپاز ۇلتتىڭ داڭقىن اسىرا وتىرىپ ىسپەن كورسەتۋىمىز كەرەك، - دەدى مەملەكەت باسشىسى.
قاسىم-جومارت توقايەۆ ءسوزىنىڭ سوڭىندا مىنبەرگە ق ر تۇڭعىش پرەزيدەنتى - ەلباسى نۇرسۇلتان نازاربايەۆتى شاقىردى.
سالتاناتتى جيىن مەرەكەلىك كونسەرتكە ۇلاستى.