قازاقپارات كۇنتىزبەسى: 30- قازان
اتاۋلى كۇندەر
حالىقارالىق ورتوپەديا مەيىربيكەلەرىنىڭ كۇنى
حالىقارالىق ورتوپەديا مەيىربيكەلەرىنىڭ كۇنى - 1990-جىلى ورتوپەديا مەيىربيكەلەرىنىڭ ۇلتتىق قاۋىمداستىعىنىڭ قولداۋىمەن كاسىبي مەرەكە رەتىندە العاش رەت ا ق ش- تا اتالىپ ءوتتى.
2001-جىلى حالىقارالىق مارتەبەگە يە بولىپ، ونى اتاپ وتۋگە ۇلى بريتانيا، كانادا، مالتا مەن گونكونگ مەملەكەتتەرى قوسىلدى.
ەستە قالار وقيعالار
1993-جىلى قازاقستان پرەزيدەنتى نۇرسۇلتان نازاربايەۆ تۇركىتىلدەس ەلدەردىڭ مەملەكەت جانە ۇكىمەتتەر باسشىلارىنىڭ كەڭەسىنە قاتىسۋ ءۇشىن تۇركيا استاناسى انكاراعا باردى.
كەڭەسكە قازاقستان، تۇركيا، ازەربايجان، قىرعىزستان، تۇرىكمەنستان جانە وزبەكستان پرەزيدەنتتەرى قاتىستى.
2006-جىلى «نەگىزگى تۇرلەردىڭ اتلاسى: جوعارى ساتىداعى وسىمدىكتەر مەن ومىرتقالى جانۋارلار» ەڭبەگى باسىلىپ شىقتى. ونىڭ ىشىنە جوعارى ساتىداعى وسىمدىكتەر مەن ومىرتقالى جانۋارلاردىڭ نەگىزگى تۇرلەرى، سونىڭ ىشىندە بالىقتاردىڭ 9 ءتۇرى، قۇستاردىڭ 54 ءتۇرى، اڭداردىڭ 18 ءتۇرى كىردى. نەگىزگىسىن قىزىل كىتاپقا ەنگەن سيرەك كەزدەسەتىن جانە جويىلۋ قاۋپى بار، رەسۋرستىق، اۋلاناتىن، ياعني ادامدار تاراپىنان ارنايى قورعاۋعا مۇقتاج تۇرلەرى قۇرايدى.
2007-جىلى ق ر پارلامەنتى ماجىلىسىندە ەۋروپارلامەنت دەپۋتاتى، ەۋروپارلامەنتتە «ەۋروپالىق حالىق پارتياسى جانە ەۋروپالىق دەموكراتتار» اتتى ءىرى ساياسي فراكسيا ءتوراعاسىنىڭ ورىنباسارى سترۋان ستيۆەنسوننىڭ «ۆەچنايا سكورب» كىتابىنىڭ ورىس تىلىندەگى اۋدارماسى تانىستىرىلدى.
اتالعان كىتاپتى اۆتور سەمەي يادرولىق پوليگونىنداعى سىناقتاردىڭ قۇرباندارىنا ارناعان. ايگىلى اعىلشىن جازۋشىسى روبەرت ستيۆەنسوننىڭ نەمەرەسى سترۋان ستيۆەنسون مەن گولليۆۋد كينوجۇلدىزى كيمبەرلي دجوزەف پوليگوننان زارداپ شەككەن قازاقستاندىقتاردىڭ تاعدىرىنان حاباردار.
ولار 1999 -جىلى سەمەي وڭىرىندە بولىپ قايتقان.
2012-جىلى الماتىدا س. ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە «ۇجىمدىق پايدالانۋ ورتالىعى» عىلىمي زەرتحاناسى قۇرىلدى. زەرتحانانى قۇرۋ ماقساتى - ادام گەنومى، پروتەوميكا جانە فارماكوگەنەتيكانى زەرتتەۋ، قازاقستاننىڭ يننوۆاتسيالىق كوشباسشى رەتىندە مارتەبەسىن بەكىتۋ جانە يننوۆاتسيالىق ورتا مەن عىلىمي الەۋەتتى قالىپتاستىرۋ.
2012-جىلى گااگادا حيميالىق قارۋدى قولدانۋعا تىيىم سالۋ ۇيىمىندا اتوم جوباسىنىڭ تۇساۋكەسەرى ءوتتى. اتوم جوباسىنىڭ ماقساتى - الەمدى يادرولىق قارۋ سىناقتارىنا قارسى كۇرەسكە بىرىكتىرۋ جانە يادرولىق قارۋ نەگىزىندە جاتقان عالامدىق قاۋىپ-قاتەر ديالوگىن جانداندىرۋ؛ يادرولىق قارۋ سىناقتارىن تۇبەگەيلى توقتاتۋ ءۇشىن الەم كوشباسشىلارىنا ىقپال ەتۋ؛ الەم قوعامداستىقتارىنىڭ نازارىن راديواكتيۆتىك ماتەريالداردىڭ بوتەن قولعا تۇسپەۋىنە، ونىڭ قورعالۋىن قامتاماسىز ەتۋگە اۋدارۋ.
2012-جىلى استاناداعى «قازمەديا ورتالىعىندا» وتكەن قازاقستاننىڭ جۋرناليستەر وداعى باسقارماسى مەن باس رەداكتورلار كلۋبىنىڭ وتىرىسىندا قازاقستان رەسپۋبليكاسى جۋرناليستەرىنىڭ ادەپ كودەكسى قابىلداندى.
2014-جىلى تۇركيانىڭ «پاشاكۋلە» مادەنيەت جانە ءبىلىم ورتالىعىنىڭ وكىلدەرى قازانعاپ كۇيشىنىڭ 160 جىلدىعىن تويلاۋعا ارنالعان ءىس-شاراعا قاتىسۋ ءۇشىن ارنايى اقتوبەگە كەلدى.
«يزميردە 300 قازاق كىرەتىن قازاق-تۇرىك مادەني ورتالىعى بار. ءبىز ارنايى وسى ورتالىقتىڭ باسشىسىنىڭ ءوتىنىشى بويىنشا تۇركياعا قازانعاپ تۋرالى بارلىق ماتەريالداردى جيناپ، اكەتۋ ءۇشىن كەلدىك. سونداي-اق، بۇل كومپوزيتوردىڭ بۇعان دەيىن تانىلعان بارلىق كۇيلەرىن قازاق دياسپوراسىنا تانىستىرۋ ءۇشىن جازىپ الامىز دەپ ۇمىتتەنەمىز»، - دەپ كەلۋدەگى ماقساتىمەن بولىستى «پاشاكۋلە» ورتالىعىنىڭ باسشىسى ەردال ەرتان.
2017 -جىلى «باكۋ- تبيليسي- كارس» (ب ت ك) تەمىرجول باعىتىنىڭ اشىلۋ ءراسىمى ءوتتى. ب ت ك جەلىسى رەسمي تۇردە الياتى اۋىلىنداعى پورتتا (باكۋدەن 90 ك م جەر) اشىلعان بولاتىن.
سالتاناتتى شاراعا تۇركيا پرەزيدەنتى رەجەپ تايپ ەردوعان، ازەربايجان پرەزيدەنتى يلحام اليەۆ، قازاقستان، وزبەكستان جانە گرۋزيا پرەمەر-مينيسترلەرى باقىتجان ساعىنتايەۆ، ابدۋللا اريپوۆ جانە گەورگي كۆيريكاشۆيلي قاتىستى. باكۋ-تبيليسي-كارس تەمىرجول باعىتى ازەربايجان-گرۋزين-تۇرىك مەملەكەتارالىق كەلىسىمىنىڭ نەگىزىندە سالىنعان. جوبانى جۇزەگە اسىرۋ 2008-جىلى باستالدى.
جوبا اياسىندا گرۋزيانىڭ احالكالاكي ستانتسياسىنان كارس قالاسىنداعى تەمىرجول ستانتسياسىنا دەيىن تەمىرجول جەلىسى سالىنعان بولاتىن. ب ت ك- نىڭ ۇزاقتىعى 826 شاقىرىمدى قۇرايدى.
2017-جىلى الماتىداعى عىلىم ورداسىنداتۇركى اكادەمياسى حالىقارالىق ۇيىمى (TWESCO) تۇركولوگيا عىلىمىنىڭ دامۋىنا سۇبەلى ۇلەس قوسقان ايگىلى عالىمدار ءابدۋالي قايدار، رابيعا سىزدىق، شورا سارىبايدى ارنايى التىن مەدالدارمەن ماراپاتتادى. سونىمەن قاتار، جيىن بارىسىندا ءابدۋالي قايداردىڭ «ۇيعىر ءتىلى لەكسيكاسىنىڭ دامۋى» جانە «قازىرگى ۇيعىر ادەبي ءتىلىنىڭ دامۋى»، تۇرىكتانۋشى ءامىر ءناجىپتىڭ «19- عاسىر تۇركى تىلدەرىنىڭ تاريحي سالىستىرمالى سوزدىگى. قۇتىپتىڭ قۇسراۋ شىرىن ەڭبەگى نەگىزىندە» اتتى 4 تومدىعى جانە «جويىلۋى قاۋپىندەگى تۇركى تىلدەرى» 4 تومدىق عىلىمي باسىلىمنىڭ تۇساۋكەسەرى ءوتتى.
2018-جىلى Digital Bridge حالىقارالىق يننوۆاتسيالىق فورۋمىندا سيفرلاندىرۋ سالاسىنداعى قازاقستانداعى العاشقى سىيلىق Digital Bridge Awards تابىستالدى.
سىيلىق اقپاراتتىق جانە كوممۋنيكاتسيالىق تەحنولوگيالار سالاسىندا جوبا وڭدەۋمەن اينالىساتىن وتاندىق كومپانيالاردى، مەملەكەتتىك بيلىك جانە جەرگىلىكتى ءوزىن-ءوزى باسقارۋشى ورگانداردى قازاقستاننىڭ سيفرلىق تۇرلەندىرۋ سالاسىندا ۇلكەن ناتيجەلەرگە ىنتالاندىرۋعا مۇمكىندىك بەرەدى.