بۇل تۋرالى كوروناۆيرۋستىق ينفەكتسيانىڭ اكەلىنۋى مەن تارالۋىنىڭ الدىن الۋ ماقساتىندا وتكەن بريفينگتە ايتىلدى.
«بۇگىنگى تاڭدا نۇر-سۇلتان قالاسىنداعى بولشەك ساۋدادا مەديتسينالىق ماسكانىڭ جەتىسپەۋشىلىگى بايقالادى. كەشە نۇر-سۇلتان قالاسى اكىمدىگى جانىنان قۇرىلىپ، ديستريبيۋتور، جەتكىزۋشى، ءدارىحانا جەلىلەرىمەن بىرىگىپ شتاب قۇرىلدى. الدىمەن بۇل بەلگىلى ءبىر دەڭگەيدە قولدان جاسالعان دۇرلىگۋ دەۋگە بولاتىنىن ايتىپ ءوتۋ كەرەك. ءبىزدىڭ ەلدەگى مەديتسينالىق ماسكا شىعارۋشىلار شيكىزات بولماۋى سەبەپتى تىعىرىققا تىرەلدى. ۇكىمەت جاقىن ورنالاسقان مەملەكەتتەردەن شيكىزات جەتكىزۋ ماسەلەسىن شەشىپ جاتىر. جاقىن ارادا دۇرلىگۋ باسىلادى دەپ ويلايمىز»، - دەيدى «ق ر فارمەتسيەۆتيكالىق قىزمەتتىڭ قولداۋ جانە دامىتۋ قاۋىمداستىعى» ز ت ب نۇر-سۇلتان قالاسى فيليالىنىڭ ديرەكتورى گۇلساراي المۋرزينا.
ونىڭ ايتۋىنشا، قاۋىمداستىق قالالىق اكىمدىك، ق ر د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى بىرلەسىپ مەديتسينالىق ماسكا باعاسىنىڭ قىمباتتاپ كەتپەۋىن قاداعالاۋ شارالارىن جۇرگىزگەن.
«قاراپايىم مەديتسينالىق ماسكانىڭ باعاسى 30 تەڭگەدەن كوتەرىلگەن جوق. تۇتىنۋشىعا 10-20 دان ارتىق ساتىلماعان. قاۋىمداستىققا كىرمەگەن ءدارىحانا جەلىلەرى دە بار، ولار وسى جاعدايدى پايدالانىپ باعاسىن كوتەرگەن بولۋى مۇمكىن. نەگىزىندە مەديتسينالىق ماسكانى ادام كوپ جينالعان قوعامدىق ورىندا جانە اۋىرعان كەزدە تاعۋ كەرەك. ءدارىحانالاردا بالالارعا جانە ەرەسەكتەرگە ارنالعان انتيباكتەريالدى، انتيسەپتيكالىق سۇيىقتىقتار بار. ونىمەن قول جۋۋعا بولادى»، - دەيدى ول.