حالىق ساناعىن جۇرگىزۋگە 30 مىڭ ادام جۇمىلدىرىلادى
«حالىق ساناعى اياسىندا 30 مىڭعا تارتا ينتەرۆيۋەردى جالدايتىن بولامىز. وسى ورايدا ەڭبەك مينيسترلىگىمەن بىرگە ءتيىستى بۇيرىق بار، وندا جۇمىس ىستەيتىن ادامداردىڭ ەڭبەگىن تولەۋ ماسەلەلەرى ەسكەرىلگەن. جالاقى بيۋجەتتە قامتىلعان جانە وسى ادامداردى جالداۋ شارالارىن وڭىرلىك ورگاندارمەن جۇرگىزەمىز»، - دەدى ن. ايداپكەلوۆ.
سونىمەن قاتار ول حالىق ساناعىن جۇرگىزۋگە تارتىلاتىن ادامدارعا ءتيىستى تالاپتار قويىلاتىنىن اتاپ ءوتتى.
«ەگەر ادام قويىلعان تالاپتارعا ساي كەلسە، ونى جۇمىسقا الىپ، وقىتامىز. وسى ماماندارمەن بىرگە ءبىزدىڭ قىزمەتكەرلەر دە بولادى، ياعني مالىمەتتەرگە قاتىستى قاجەتتى سالىستىرىپ تەكسەرۋ جۇمىستارىن جۇرگىزەدى. جالداناتىن ادامداردىڭ ەڭبەكاقىسى ءتۇرلى ساناتقا قاراي وزگەرىپ تۇرادى، 60 مىڭنان 85 مىڭ تەڭگە ارالىعىندا بولادى»، - دەدى نۇربولات ايداپكەلوۆ.
بۇدان بۇرىن حابارلانعانداي، جالپى ۇلتتىق حالىق ساناعى ەلىمىزدە 2020-جىلى وتكىزىلەدى.