قازاقستان مەن تاجىكستان ازاماتتارى ەكى ەل اۋماعىندا 30 كۇنگە دەيىن تىركەۋسىز جۇرە الادى
مۇنداي جەڭىلدىك قاراستىرىلعان زاڭ جوباسى بۇگىن ءماجىلىستىڭ جالپى وتىرىسىندا ماقۇلداندى، دەپ حابارلايدى قازاقپارات ءتىلشىسى.
وتىرىستا «قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى قازاقستان رەسپۋبليكاسى ازاماتتارىنىڭ تاجىكستان رەسپۋبليكاسىنىڭ اۋماعىندا جانە تاجىكستان رەسپۋبليكاسى ازاماتتارىنىڭ قازاقستان رەسپۋبليكاسىنىڭ اۋماعىندا بولۋ ءتارتىبى تۋرالى كەلىسىمدى راتيفيكاتسيالاۋ تۋرالى» ق ر زاڭىنىڭ جوباسىن ق ر ىشكى ىستەر ءمينيسترى قالمۇحانبەت قاسىموۆ تانىستىرعان بولاتىن.
ونىڭ ايتۋىنشا، كەلىسىمگە 2018-جىلدىڭ ناۋرىز ايىندا استانادا قول قويىلعان.
كەلىسىم ەكى تاراپ اۋماعىندا ازاماتتاردىڭ 30 كۇنگە دەيىن تىركەۋسىز جانە جالپى 90 كۇن بولۋىن كوزدەيدى. كەلىسىمدى راتيفيكاتسيالاۋ تاراپتاردىڭ اۋماعىندا ازاماتتاردىڭ بولۋى ماسەلەسىن قۇقىقتىق رەتتەۋگە مۇمكىندىك بەرەدى. 2018-جىلعى شىلدەدە كەلىسىمدى تاجىكستان پارلامەنتى راتيفيكاتسيالاعان. وسى زاڭدى قابىلداۋ الەۋمەتتىك-ەكونوميكالىق جانە قۇقىقتىق تەرىس سالدارعا اكەپ سوقپايدى»، - دەدى قالمۇحانبەت قاسىموۆ.
ءماجىلىس دەپۋتاتتارى زاڭ جوباسىن ماقۇلداپ، سەناتقا جولدادى.