ورازاعا دەيىن دايىندالۋى ءتيىس 30 نارسە
1. رامازانعا دايىندىق
كوپتەن بەرى كورمەگەن قادىرلى ءبىر قوناقتى كۇتىپ الار كەزدە ءۇي ءىشى ىبىرسىپ جاتسا، بار جۇمىسىڭدى تاستاپ، ءۇيىڭدى تازارتۋعا كىرىسەسىڭ عوي! سول سياقتى ءوزىڭدى 11 اي كۇتتىرىپ، ەسىگىڭنەن ەنگەلى تۇرعان قاسيەتتى رامازانعا دايىندىقتى شاعباننان باستاپ كەتكەنىڭ ءجون. وتكەن ءبىر جىل ىشىندە قانداي كۇنالار جاسادىڭ، قانداي ساۋاپتاردان قۇر قالدىڭ، ءبارىن سارالاپ، ەلەكتەن وتكىزىپ، ءوز- وزىڭنەن ەسەپ ال. جاماندىقتان تيىلىپ، جاقسىلىقتى ارتتىرۋدىڭ جولىن ىزدە. ول ءۇشىن 11 اي بويى حارامعا قاراعان كوزدەرىڭ ءۇشىن، حارامدى ەستىگەن قۇلاقتارىڭ ءۇشىن، حارامدى ۇستاعان قولدارىڭ ءۇشىن، حارامعا بارعان اياقتارىڭ ءۇشىن اللاھ الدىندا تاۋبە ەت. سوندا عانا جاڭا رامازانعا ساقاداي- ساي ءازىر بولىپ باراسىڭ. ەسىڭدە بولسىن، رامازانعا دايىندىقتى شاعبان ايىنان باستاعانىڭ ابزال. ال، الداعى قاسيەتتى ايعا ازىرلىكسىز كىرۋ نەندەي وكىنىش!
2. رامازانعا نيەت
رامازاندا جاسايمىن دەگەن قۇلشىلىقتارىڭا شاعبان ايىنان باستاپ نيەتتەن. الدىن- الا نيەت ەتپەي، ەشبىر امال قابىل بولمايدى. رامازانعا شىنايى تۇردە نيەت ەتكەن سوڭ، وتىز كۇن ورازاعا قاتىستى ۇكىمدەردى ۇيرەنە باستاعانىڭ ءجون. سول ۇكىمدەردى قازىردەن باستاپ، ياعني شاعبان ايىندا ءۇي ىشىڭە جانە جاقىن تۋىستارىڭا ايتىپ تۇسىندىرە بەر.
3. ءوز ءناپسىڭدى تاقۋالىققا تاربيەلەۋ
قازىردەن، ياعني شاعبان ايىنان باستاپ ءوز ءناپسىڭدى تاقۋالىققا تاربيەلە. ويتكەنى، رامازان تاقۋالىقتى ودان ءارى ارتتىرۋعا مۇمكىندىك بەرەتىن اي. قۇدايدان قورقا ءبىلۋ - مۇمينگە مىندەت. «ءاي، يمان كەلتىرگەندەر! سەندەردەن بۇرىنعىلارعا پارىز ەتىلگەنىندەي، سەندەرگە دە ورازا پارىز ەتىلدى» - دەپ باستالاتىن اياتتىڭ «مۇمكىن تاقۋالىق قىلارسىڭدار» دەگەن سوزدەرمەن اياقتالۋىندا ۇلكەن سىر بار. بۇحاريدە كەلگەن حاديستە پايعامبارىمىز (س. ع. س. ): «كىمدە- كىم وتىرىك ءسوز بەن وعان امال قىلۋدان تىيىلماسا، اللاھ ونىڭ جەپ- ىشۋدەن تىيىلۋىنا مۇقتاج ەمەس»، - دەپ ايتقان.
4. تۋىستىق قارىم- قاتىناستى نىعايتۋ
شاعبان ايىنان باستاپ تۋىستارىڭمەن اراداعى بايلانىسىڭدى ودان ءارى نىعايتا ءتۇس. اعايىندارىڭمەن بايلانىستى ءۇزىپ الۋدان ساقتان. ءابۋ ھۋرايرادان (ر. ع. ) جەتكەن حاديستە پايعامبار (س. ع. س. ) بىلاي دەگەن: «اللاھ جاراتىلىستاردى جاراتىپ بولعان كەزدە، تۋىستىق بايلانىس تۇردى. اللاھ وعان: «نە بولدى؟» - دەدى. ول: «بۇل - (تۋىستىق قاتىناستى) ۇزۋدەن وزىڭنەن پانا سۇرايتىننىڭ ورنى»، - دەدى. (اللاھ): «سەنى ساقتاعانمەن بايلانىسىمدى ساقتاسام، ال سەنى ۇزگەنمەن بايلانىسىمدى ۇزسەم رازى بولاسىڭ با؟» - دەدى. ول: «ءيا، ۋا راببىم!» - دەدى. (سوندا اللاھ): «ەندەشە سولاي بولسىن!»، - دەدى.»
5. ارتىق ويدان ارىلۋ ايى
كۇنادان تازا، ساۋ جۇرەكتەن ابزال نىعمەت بار ما؟! كەيبىرەۋلەر جانى تىنىشتىق تاپپاي جۇرگەن كەزدە، سەن كوڭىلىڭدى قۇلشىلىققا عانا قۇلشىندىرىپ، رامازان ايىنا ءوزىڭدى پاك سەزىنگەن كۇيدە ەنۋدى قالار ما ەدىڭ؟ ول ءۇشىن ورازاعا كىرەردەن بۇرىن، شاعبان ايىنان باستاپ، جۇرەگىڭدى لاستىقتان تازالاۋعا تىرىس. ساناڭدى ارتىق ويدان ارىلتقانىڭ ابزال.
6. ۋاقىتىڭدى ۇتىمدى پايدالان
قازىرگى مۇسىلماندار ءوز ۋاقىتىنىڭ كوپ بولىگىن ينتەرنەت اقتارۋمەن وتكىزەدى. ءتىپتى، رامازان ايىندا دا ساۋاپ جيناۋ مۇمكىندىكتەرىن بوس جىبەرىپ الادى. ال كەزىندە يمام ماليك سىندى عالىمداردىڭ ورازا ايىندا ۋاقىتتى ىسىراپ ەتۋدى بىلاي قويعاندا، ءىلىم يەلەرىمەن دە بىرگە وتىرۋدان بويىن اۋلاق سالىپ، قۇرانمەن عانا وڭاشالاناتىنىن كوپ مۇسىلمان بىلە مە ەكەن؟ ەندەشە، وزگە ايلاردا ۋاقىتىڭدى ينتەرنەتپەن ءولتىرىپ جۇرگەن بولساڭ، الداعى ورازاعا ازىرلىگىڭدى شاعبان ايىنان باستا! ۋاقىتىڭدى بارىنشا ۇنەمدە! رامازان سەنى كۇتپەيدى، كەرىسىنشە سەن ونى ابىرويمەن كۇتىپ ال!
7. وتكەن رامازاندى ەسكە ءتۇسىرىپ، جاڭا رامازانعا قارىزسىز كىرۋ
رامازانعا اياق باسپاستان بۇرىن، شاعبان ايىندا تۇرىپ كىشكەنە وي جۇگىرت. وتكەن ورازانى تۇگەل تۇتىپ پا ەدىڭ؟ ەسىڭە ءتۇسىر. مۇمكىن ءبىر- ەكى كۇنىن ءۇزىرلى سەبەپتەرمەن تۇتا الماي قالعان شىعارسىڭ؟ ۇمىتىپ، قازاسىن وتەمەي جۇرگەن بولارسىڭ؟ وسى رامازانعا قارىز بولماي كىرگەنىڭ ءجون. ول ءۇشىن، وتكەن جىلدان قالعان ورازالارىڭنىڭ كۇنىن تولىقتىر!
8. قۇران ايىنا قۇر كىرمەۋ
رامازان - قۇران ايى. ول ايدا مۇسىلماندار قۇران وقۋعا ەرەكشە ءمان بەرەدى. باسىنان اياعىنا دەيىن وقىپ، حاتىم قىلادى. رامازاندا قۇران وقۋ وزىڭە جەڭىل بولۋى ءۇشىن، شاعبان ايى كىرگەننەن ونى كوپ وقي باستا. شاعباندا قۇرانعا ارنايى ۋاقىت ءبول. ەگەر جاي كۇندەرى قۇراننان ءبىر- ەكى بەت قانا وقىپ جۇرگەن بولساڭ، شاعبان ايىندا ءار كۇنى ودان ەكى- ءۇش ەسە كوبىرەك وقىعانىڭ ءجون. قازىردەن وسىلاي ەتەر بولساڭ، رامازانداعى قۇران وقۋىڭ جەڭىل بولادى.
9. تاراۋيح نامازىنا دايىندىق
رامازاندا جاسالاتىن ارنايى قۇلشىلىقتار بار. سولاردىڭ ءبىرى - تاراۋيح نامازى. وسىنداي ۇزاق وقىلاتىن نامازدارعا تىك تۇرىپ شىداس بەرۋگە اعزاڭىز ۇيرەنبەگەن بولۋى مۇمكىن. سوندىقتان شاعبان ايىنان باستاپ، ءناپىل نامازداردى ۇزاعىراق تىك تۇرىپ وقۋعا داعدىلانعانىڭ ءجون. ەندەشە، رۋكۋعتا ۇزاق يىلۋگە، ساجدەدە كوبىرەك جاتۋعا شاعبان ايىنان باستاپ دەنەڭدى ۇيرەت.
10. دۇعالاردى دۇرىستاۋ
شاعبان ايىنان باستاپ ءوزىڭدى اللاھ تاعالاعا ۇزاق جالبارىنۋعا تاربيەلە. پايعامباردان (س. ع. س. ) جەتكەن ارنايى دۇعالاردى جاتتا. قاراپايىم دۇعالاردان گورى اللاھ ەلشىسىنىڭ (س. ع. س. ) اۋزىمەن ايتىلعان دۇعالاردىڭ قابىل بولۋ ىقتيمالدىعى باسىم، وسىنى ۇمىتپا.
11. رامازانداعى يعتيكافقا ازىرلىك
ءوزىڭدى مەشىتتە كوپ وتىرۋعا ۇيرەت. شاعبان ايى بۇل ءۇشىن تاپتىرمايتىن مۇمكىندىك. ءار نامازدان كەيىن مەشىتتە كوبىرەك قالۋعا تىرىس. بۇل سەنىڭ رامازاندا يعتيكافقا كىرۋىڭدى جەڭىلدەتەدى. بىرنەشە ساعاتقا بولسا دا، نامازدان تىس ۋاقىتتا اللاھ تاعالانىڭ ۇيىنە ارنايى اتىڭدى بۇر. ءوز ءناپسىڭدى مەشىتتە ۇزاق وتىرۋعا تاربيەلە. رامازانداعى يعتيكافقا وسىلاي ازىرلىك قىل.
12. ورازا تۇتۋعا داعدىلانۋ
رامازاننىڭ العاشقى كۇندەرىندەگى ورازا اعزاڭىزعا اۋىر ءتيۋى مۇمكىن. سوندىقتان شاعبان ايىنان باستاپ ورازانى كوبىرەك تۇت. ماسەلەن، ءبىر كۇن تۇتساڭ، ەكىنشى كۇنى اۋزىڭ اشىق بولسىن. ءتىپتى، شاعبان كۇندەرىنىڭ كوپشىلىگىن ورازامەن وتكىزسەڭ دە بولادى. ويتكەنى، ايشا انامىز (ر. ع. ): «...اللاھ ەلشىسىنىڭ شاعبانداعىداي كوپ ورازا تۇتقانىن كورگەن ەمەسپىن» - دەگەن.
13. كەدەي- كەپشىككە كومەكتەسۋ
شاعبان ايىنان باستاپ مىسكىندەردى تاماقتاندىرۋعا، ورازا تۇتۋشىلاردىڭ اۋزىن اشتىرۋعا بويىڭدى ۇيرەت. ماسەلەن، تۇسكى استى مولىراق ازىرلەپ، ارتىعىن اپارىپ پاقىرلار مەن مىسكىندەرگە تاراتىپ جىبەر. ءومىر سەن ويلاعانداي ەمەس. ءقازىر توق بولسا، ەرتەڭ اش وتىراتىن وتباسىلار بار. شاعبان ايىندا توڭىرەگىڭدەگى كەدەي- كەپشىككە كومەكتەس. سوندا رامازان ايىندا مۇقتاجدارعا دەگەن مەيىرىمىڭ ارتادى.
14. ساداقامەن ساۋاپ جيۋعا داعدىلانۋ
شاعبان ايىندا كۇن سايىن ساداقا بەر. قالتاڭا قولىڭدى كۇشتەپ سال. بۇلاي ەتۋ ناپسىڭە اۋىر ءتيۋى مۇمكىن. ءبىراق الداعى رامازان ايىندا كوپ ساداقا بەرەتىن مۇسىلمانداردىڭ قاتارىنا قوسىلۋ ءۇشىن وسى باستان قولىڭدى اشىق ۇستاۋعا ۇيرەتكەنىڭ ءجون. ءابۋ ھۋرايرادان (ر. ع. ) جەتكەن حاديستە اللاھ ەلشىسى (س. ع. س. ) بىلاي دەپ ايتقان: «ءار كۇنى پەندە ويانعان كەزىندە كوكتەن ەكى پەرىشتە تۇسەدى. ولاردىڭ بىرەۋى: «ۋا، اللاھ! بەرۋشىنىڭ دۇنيەسىن ارتتىر!» - دەسە، ەكىنشىسى: «ۋا، اللاھ! ساراڭنىڭ دۇنيەسىن جوي!» - دەپ جالبارىنادى». مىنەكي، الداعى رامازاندا ساداقامەن ساۋاپ جيعىڭ كەلسە، ونىڭ ازىرلىگىن شاعبان ايىنان باستاپ كەت.
15. ۋمرا جاساۋعا شاعباننان باستاپ ازىرلەنۋ
اللاھ قالاسا، وسى رامازاندا مەككەدەگى ءال- حارام مەشىتىنە بارىپ ۋمرا جاساۋعا نيەتتەنگەن بولساڭ، وندا شاعبان ايىنان باستاپ دەنە شىنىقتىرۋمەن اينالىس. ءار كۇنى شامامەن ءبىر ساعاتتاي ءوزىڭدى قيناپ جاياۋ ءجۇر. رامازان ايىندا ۋمرا جاساۋعا شاعباننان باستاپ جان- جاقتى ازىرلىك جاسا.
16. ارتىق استان تىيىلۋ
شاعبان ايىندا تاماقتى از جە. رامازانعا قادام باسقان كەزىڭدە ارانىڭ اشىلىپ تۇرماسىن. ورازا ايىنا تويىنىپ كىرۋ سەنىڭ وتىز كۇنگى قۇلشىلىعىڭا كەرى اسەرىن تيگىزۋى مۇمكىن. قازىردەن باستاپ تاماقتانۋ ۋاقىتىن ازايتا بەر. ولاي ەتۋ ساعان اۋىر تيسە، وندا تاماقتىڭ مولشەرىن عانا ازايت. ءناپسىڭدى وسىلاي الداپ قوي. نەمەسە، اۋىر تاماقتاردى مۇلدەم توقتاتىپ، كوكونىس پەن جەمىس- جيدەكتى كوبىرەك قولدان. سوندا رامازانعا جەڭىل كىرەسىڭ، ۇيقىڭ دا ازايىپ، ساناڭ سەرگيدى.
17. ەرتە جاتىپ، ەرتە تۇرۋعا داعدىلانۋ
تۇنگى ۇيقىسىزدىققا جول بەرمە. شاعبان ايىندا ءوزىڭدى قاتال ۇستا. قازىردەن باستاپ قۇپتاننان سوڭ ەرتە ۇيىقتاپ، تاڭ نامازىنان بۇرىن ويانۋعا داعدىلان. سوندا رامازاندا سارەسى ۋاقىتىندا ۇيىقتاپ قالمايتىن بولاسىڭ، ءارى تۇنگى قۇلشىلىقتارعا سەرگەك وياناسىڭ. ال، شاعباندا بوساڭسي باستاساڭ، ورازادا وپىق جەيسىڭ.
18. ۇيقىڭدى ازايتۋعا ازىرلەنۋ
شاعبان ايىنان باستاپ از ۇيىقتاپ ۇيرەن. وزگە ايلاردا سەگىز ساعات ۇيىقتاپ جۇرگەن بولساڭ، شاعبان كەزىندە ۇيقىعا بەس- التى ساعاتىڭدى عانا ءبول. ويتكەنى، الدا ورازا ايى كەلە جاتىر. ۇيقىڭدى قازىردەن باستاپ تاربيەلەمەسەڭ، كەشىرىم ايىن ۇيقىمەن وتكىزىپ الاسىڭ. بۇدان اسقان قاسىرەت بار ما؟
19. ءناپىل نامازى مەن زىكىردى كوبەيتۋ
قانداي دا ءبىر سەبەپپەن، وسى جىلعى رامازاندا ۋمرا جاساي المايمىن- اۋ دەپ ويلاساڭ، وندا شاعبان ايىنان باستاپ تاڭ نامازىنان كەيىن كۇن شىققانشا مەشىتتە وتىرىپ، اللاھ تاعالانى زىكىر ەت جانە ەكى راكاعات ءناپىل نامازىن وقى. سوندا ونىڭ ساۋابى قاجىلىق ەتكەن ءارى ونىمەن قوسا ۋمرا جاساعان كىسىگە تەڭ كەلەدى. مۇنداي قۇلشىلىقتى قازىردەن، ياعني شاعبان ايىنان باستاپ كەتكەنىڭ ءجون. سەبەبى، ءاناستان (ر. ع. ) جەتكەن ءبىر حاديستە پايعامبارىمىز (س. ع. س. ): «كىمدە- كىم تاڭ نامازىن جاماعاتپەن وقىسا، سوسىن كۇن شىققانعا دەيىن اللاھ تاعالانى زىكىر ەتىپ وتىرسا، سوسىن ەكى راكاعات ناماز وقىسا، بۇل وعان قاجىلىق پەن ۋمرانىڭ تولىق ساۋابىنداي بولادى»، - دەپ ايتقان.
20. قۇلشىلىقتاردى كوبەيتۋ
وزگە ايلاردا جاساي الماي جۇرگەن قۇلشىلىقتارىڭدى جولعا قويۋ ءۇشىن، رامازان ايى قاشان كەلەر ەكەن دەپ كۇتىپ وتىرماستان، ونى شاعبان ايىنان باستاپ كەت. ماسەلەن، ءبىر وتىرعاندا كوپ ايات وقىپ تاستا نەمەسە ءومىرى بەرىپ كورمەگەن مولشەردە ساداقا بەر. مۇنىڭ ءبارى ساعان الداعى رامازان ايىندا ۇلكەن- ۇلكەن قۇلشىلىقتاردى ورىنداۋىڭا سەپتىگىن تيگىزەدى.
21. جانازا نامازىنا قاتىسىپ، ءولىمدى كوبىرەك ەسكە الۋ
شاعباندا جانازا نامازىنا قاتىسۋعا تىرىس، مايىتپەن بىرگە مازاراتقا دەيىن ەرىپ بار، ءتىپتى ونى جەرلەۋگە قاتىس. مۇنىڭ ءبارى الداعى رامازان ايىنداعى تاقۋالىعىڭدى نىعايتا تۇسەدى. ءولىم - ەڭ ۇلكەن ۋاعىزشى. ولىك شىققان ۇيگە ءوزىڭدى كۇشتەپ الىپ بار. ءوزىڭدى سول ءمايىتتىڭ ورنىنا قويىپ كور. قايعىعا دۋشار بولعان ءمايىت جاقىندارىنىڭ ورنىنا ءوزىڭدى قويىپ كور. دەمەك، شاعبان ايى - ورازاعا دەيىن يمانىڭدى قۋاتتاپ الۋ ءۇشىن ەڭ جاقسى مۇمكىندىك.
22. ورازادا ورىندايتىن قۇلشىلىقتارعا جوسپار جاساۋ
قازىردەن باستاپ ۋاقىتىڭدى جۇيەلى پايدالان. ورازادا ورىندايتىن قۇلشىلىقتارىڭدى ساراپتاپ، كەستە ەتىپ ءتۇزىپ ال. قولىڭا قالام الىپ جازا باستا. شاعبان ايىنان باستاپ قۇلشىلىقتارىڭدى كوزىڭنىڭ قاراشىعىنداي ساقتا. ورازاداعى تىنىس- تىرشىلىگىڭ جۇيەلى ءوتسىن دەسەڭ، شاعبان ايى تاپتىرمايتىن مۇمكىندىك ەكەنىن ءبىل.
23. كوبىرەك تاۋبە جاساۋ
پايدا بەرمەيتىن كەشكى وتىرىستاردان بويىڭدى اۋلاق سال. ۋاقىتىڭدى ۇرلاپ جۇرگەن تەلەديدار، كومپيۋتەر جانە وزگە دە قۇمارلىقتارىڭدى جيىستىرىپ قوي. ال، ەگەر حارام ىستەرمەن اينالىسىپ جۇرگەن بولساڭ، ولاردان ءدال وسى شاعبان ايىندا تولىعىمەن ارىلۋىڭ كەرەك. رامازانعا پاك كۇيدە كىر. قازىردەن باستاپ كۇنالارىڭا تاۋبە ەت. ەندى قايتالامايمىن دەپ وزىڭە- ءوزىڭ سەرت بەر.
24. شاعباننان باستاپ تەمەكىدەن تىيىلۋ.
تەمەكىنى تاستاي الماي جۇرگەندەرگە ايتارىمىز - رامازان مۇنداي جاعىمسىز قىلىقتارىڭدى تاستاۋ ءۇشىن تاپتىرمايتىن مۇمكىندىك. الايدا، رامازان ايىن كۇتىپ وتىرماستان شىلىمدى شاعباننان باستاپ تاستاعانىڭ ابزال. سوندىقتان، قازىردەن باستاپ «تەمەكىنى قالايدا تاستاۋىم كەرەك!» دەپ نيەتتەن. «اللاھ رازىلىعى ءۇشىن شەكپەيىنشى» دەپ نيەتتەن. ارينە، ونى تاستاۋ ناپسىڭە وڭاي تيمەيدى. وسى ىستە جاردەم ەتۋىن سۇراپ، اللاھ تاعالاعا جالبارىن. دەنساۋلىعىڭ - امانات. ساعان تاپسىرىلعان ءاربىر امانات ءۇشىن اللاھ الدىندا جاۋاپ بەرەتىنىڭدى ۇمىتپا.
25. ءسوزدى تۇزەۋ
قازىردەن باستاپ ءتىلىڭدى ساقتا. ءوزىڭدى- ءوزىڭ تەك قانا شىن سويلەۋگە تاربيەلە. ءتىلىڭ اللاھتى پاكتەپ، زىكىر ايتۋدان شارشاماسىن. ءتىلىڭدى شاعبان ايىندا ساقتاماساڭ، رامازاندا عايبات ايتۋدان جانە وتىرىك سويلەۋدەن ارىلامىن دەپ ويلاما. حاديستە ايتىلعانىنداي، نە جاقسى ءسوز سويلە نەمەسە ۇندەمە. ەڭ ءتيىمدى ازىرلىك - وسى. ال، «جاقسى سوزگە» تاسبيح، تاھليل، يستيعفار سىندى زىكىرلەر جاتاتىنى ەسىڭدە بولسىن.
26. جۇمىسىڭا جيناقى بولۋ
شاعبان ايىنان باستاپ كۇندەلىكتى شارۋالارىڭدى جۇيەگە كەلتىر. تىرشىلىگىڭ قۇلشىلىعىڭنان اسىپ تۇسپەسىن. ويتكەنى، رامازانداعى رەتتىلىك كوپ نارسەنى جەڭىلدەتەدى. ول ءۇشىن شاعباندا شاشىراڭقى بولماۋىڭ كەرەك. جۇمىسىڭدى جيناقى ۇستا. وتىز كۇن ورازادا جەكە باستىڭ جۇمىستارى مەن ءمانسىز ماسەلەلەردىڭ بولماعانى لازىم.
27. قۇران سۇرەلەرىن كوپ جاتتاۋ
قۇراننان جاتقا ايتاتىن اياتتارىڭدى تاعى ءبىر قايتالاپ شىق. ءدال وسى شاعبان ايىندا بۇرىنعى جاتقا بىلەتىن سۇرەلەرىڭنىڭ قاتارىنا تاعى دا ءبىر- ەكى سۇرە قوس. رامازاندا تاراۋيحتى ۇيدە وقي قالساڭ، فاتيحاعا قوسىپ ايتاتىن سۇرەلەرىڭ كوپ بولسىن. ءار كۇنگى نامازدا ءار ءتۇرلى سۇرە وقۋدىڭ يمان احۋالىڭدى كۇشەيتە تۇسەتىنىن تۇسىنە ءبىل.
28. بازاردان الاتىن كەرەك- جاراققا كۇنى بۇرىن قامدانۋ
وكىنىشكە وراي، رامازاندا بازارلار مەن دۇكەندەردە ساۋدا ساپىرىلىسىپ كەتەدى. ورازانىڭ كەلىپ قالعانىن مۇرىنعا تىرەلگەندە ءبىر- اق بىلەتىن بەيقامدىعىمىز تاعى بار. سوندىقتان دۇكەننەن الىناتىن ازىق- تۇلىك پەن كيىم- كەشەككە شاعبان ايىنان باستاپ قامدان.
29. جاقىن جۇرگەن ادامدارعا ءناسيحاتتى كۇشەيتۋ
توڭىرەگىڭدەگى ادامدارعا ءمان بەر. رامازانعا ءوزىڭ عانا دايىندالا بەرمەي، تۋىستارىڭدى ازىرلىككە شاقىر. بىلمەگەنىڭدى الدىمەن ءوزىڭ پىسىقتا. ال، بىلگەنىڭدى وزگەلەرگە جەتكىز. ۇيىڭدە، جۇمىس ورنىڭدا، اعايىندار اراسىندا ورازاعا دايىندىقسىز كىرۋگە بولمايتىنىن ايتۋدان جالىقپا. سوندا عانا سەنىڭ اينالاڭداعىلار شاعبان ايىنىڭ زور ازىرلىك ايى ەكەنىن ۇعىنادى. تەلەسەريالعا تەلمىرگەن تۋىسىڭدى رامازان ازىرلىگىنە سابىرمەن شاقىر. وتىز كۇن ورازانىڭ كەشىرىم كۇندەرى ەكەنىن وتباسىڭا دۇرىستاپ ءتۇسىندىر.
30. وتباسىڭداعىلارمەن وڭتايلى جۇمىس جاساي ءبىلۋ
شاعبان ايىنان باستاپ وتباسى مۇشەلەرىنىڭ اراسىنان باليعات جاسىنا تولعالى تۇرعاندارىن بوس قويما. وزىڭمەن بىرگە سارەسىنە تۇرعىز. جارتى كۇن تۇتسا دا ورازا ۇستاپ ۇيرەنە بەرسىن. كىشكەنتايلارىن ماجبۇرلەمە. ەكى- ءۇش ساعاتتان سوڭ اۋزىن اشىپ جىبەرسە دە، ولاردىڭ بۇل ارەكەتى سەن ءۇشىن ۇلكەن جەڭىس. قازىردەن ورازا تۇتىپ داعدىلانسا، كەلەسى جانە ودان كەيىنگى رامازاندا بۇل قۇلشىلىق ولار ءۇشىن جەڭىلدەي تۇسەرى انىق.