تالدىقورعاندا «التىناي» حالىق ءبيىنىڭ مەملەكەتتىك انسامبلى 30 جىلدىعىن اتاپ ءوتتى
«ساحنادا 30 جىل - بۇل ماڭىزدى جەتىستىك قانا ەمەس، سونىمەن بىرگە ۇزاق تا، تىڭعىلىقتى ەڭبەك، ءتوزىم، تاباندىلىق، ءوز ىسىنە شىنايى بەرىلگەندىكتىڭ ناتيجەسى، - دەدى ءوزىنىڭ قۇتتىقتاۋ سوزىندە وبلىس اكىمى ا. باتالوۆ. - وزدەرىڭىز بىلەسىزدەر، انسامبلدىڭ شىعارماشىلىق قىزمەتى جىلدارىندا قوعامداعى، ەلدەگى، الەمدەگى تۇبەگەيلى وزگەرىستەرگە بايلانىستى ەڭسەرگەن بيىكتەرى دە، قۇلدىراعان كەزدەرى دە بولدى. بۇل قايتا قۇرۋ، ەكونوميكالىق داعدارىس، مەملەكەتىمىزدىڭ قالىپتاسۋ كەزەڭدەرى ەدى. وسىنىڭ بارلىعى مادەنيەت سالاسىنا اسەرىن تيگىزبەي قويعان جوق. تاۋەلسىزدىك العاننان كەيىن عانا ەل مادەنيەتىن قولداپ، دامىتۋعا مۇمكىندىكتەر كەڭەيە ءتۇستى».
ونىڭ ايتۋىنشا، مەملەكەتتىك قولداۋدىڭ ارقاسىندا الماتى وبلىسىندا وسى سالاعا ەرەكشە نازار اۋدارىلادى. سونىمەن، اعىمداعى جىلى مادەنيەت سالاسىنىڭ بيۋدجەتى 4,5 ميلليارد تەڭگەنى قۇرادى. بۇل قاراجات مادەنيەت نىساندارىن سالۋعا جانە ولاردى كۇردەلى جوندەۋگە، كادر قۇرامىن كەڭەيتۋگە باعىتتالۋدا.
سونىمەن، «التىناي» انسامبلىنىڭ 30 جىلدىعىنا بايلانىستى وبلىستىق بيۋدجەتتەن ارنايى كوستيۋمدەر تىگۋگە، مۋزىكالىق اسپاپتار، دىبىس جابدىعىن ساتىپ الۋعا، جاس مامانداردى تارتۋعا 40 ميلليون تەڭگە ءبولىندى.
سونداي- اق انسامبلگە 30 شتاتتىق بىرلىك ءبولىندى، رەسپۋبليكانىڭ ءار تۇپكىرىنەن بالەت ارتىستەرى شاقىرتىلۋدا.
30 ميلليون تەڭگە گاسترولدىق قىزمەت ءۇشىن ارنايى اۆتوبۋس ساتىپ الۋعا ءبولىندى.
«التىناي» شىعارماشىلىعى - جوعارى كاسىبيلىكتى، جارقىن ارتىستىك كەلبەتتى، ەرەكشە قۇلشىنىستى قامتيتىن ءداستۇر سەلبەسۋى. بۇل جاعىنان ءانسامبلدىڭ ۇلتتىق مادەني يگىلىگى، قۇرمەتتى ورنى بار»، - دەپ اتاپ ءوتتى باتالوۆ.
انسامبل قاتىسۋشىلارىنا «قازاقستان رەسپۋبليكاسىنىڭ مادەنيەت سالاسىنىڭ ۇزدىگى» ءتوس بەلگىلەرى، قۇرمەت گراموتالارى، كەيبىرىنە پاتەر كىلتى تابىس ەتىلدى.
«التىناي» مەملەكەتتىك حالىق ءبيى انسامبلى 1985 -جىلى ونەر زەرتتەۋشىسى، تاريحشى- ەتنوگراف وزبەكالى جانىبەكوۆتىڭ ىقپالىمەن ومىرگە كەلدى. حورەوگرافيا ۋچيليشەسىن بىتىرگەن تۇلەكتەردەن قۇرىلعان بۇل ءانسامبلدىڭ الدىنا قويعان نەگىزگى ماقساتى - قازاق حالىق ءبيىن ناسيحاتتاۋ بولاتىن. كونسەرتتىك باعدارلاماسى تەك قازاق حالىق بيلەرىنەن قۇرالعان انسامبل كورەرمەننىڭ كوزايىمىنا اينالدى.
قازىرگى تاڭدا انسامبلدىڭ نەگىزىن قۇراپ وتىرعان - رەسپۋبليكامىزدىڭ تۇكپىر- تۇكپىرىنەن كەلگەن جاس ماماندار. ۇجىمنىڭ رەپەرتۋارىندا ج. بايداراليننىڭ، ق ر ەڭبەك سىڭىرگەن ونەر قايراتكەرى م. تىلەۋبايەۆتىڭ، گ. ورىمبايەۆانىڭ، قىتاي حالىق رەسپۋبليكاسىنىڭ 1- دارەجەلى بالەتمەيستەر- قويۋشىسى ن. تايىردىڭ، ولگا ۆسيەۆولودسكايا- گولۋشكيەۆيچتىڭ جانە ت. ب. قويىلىمدارى بار. سونىمەن قاتار، ءانسامبلدىڭ بۇگىنگى كۇنى قول جەتكىزگەن بيىكتەرىنە تويعان ءىزىموۆا، ۇسەن ماقان سىندى ءبي ونەرى شەبەرلەرىنىڭ ەڭبەگى زور.
«التىناي» م ح ب ءانسامبلى وبلىس، رەسپۋبليكا كولەمىندە عانا ەمەس، ءوز ونەرىن ۆەتنام، لاوس، بەلگيا، وڭتۇستىك كورەيا، ءۇندىستان، نەپال، تۇركيا، يتاليا، پاكىستان، مەكسيكادا جانە دە تاعى باسقا شەت ەلدەردە پاش ەتىپ، ەلىمىزدىڭ بي ونەرىن ناسيحاتتادى.
2013 -جىلى انسامبل بيشىلەرى «ت م د ەلدەرى گۋمانيتارلىق ىنتىماقتاستىعىنىڭ مەملەكەتارالىق قورى» - نىڭ قولداۋىمەن جىل سايىن «دوستاستىقتىڭ مادەني استاناسى» ايدارىمەن وتكىزىلەتىن مادەني شارا شەڭبەرىندە ازەربايجان رەسپۋبليكاسىندا «گابالا - كۋلتۋرنايا ستوليتسا سودرۋجەستۆا 2013 گودا» اتتى گالا- كونسەرتكە قاتىسىپ، مىڭجىلدىق تاريحى بار كونە گابالانى جەڭىسىمەن قۇتتىقتاپ، ءوز ونەرلەرىن تارتۋ ەتتى.
انسامبل يۋنەسكو-نىڭ مادەنيەت، ءبىلىم سفەراسىنداعى باعدارلامالارىنا قولداۋ كورسەتكەنى ءۇشىن، مادەني مۇرانى ساقتاۋ جولىنداعى ارەكەتتەرى ءۇشىن «العىس حاتىمەن» ماراپاتتالعان.
2014 -جىلى «ايماقتار الامانى» رەسپۋبليكالىق تەلەبايقاۋىندا وبلىس نامىسىن قورعاپ، جۇلدەلى Ⅱ ورىنعا يە بولىپ قايتتى.
قازىرگى تاڭدا انسامبل رەپەرتۋارىندا 70 دەن استام بيلەر مەن ءبي قويىلىمدارى بار. انسامبل - ەلىمىزدەگى «مەملەكەتتىك» دەگەن اتاعى بار ءۇش ۇجىمنىڭ ءبىرى. 2015 -جىلدان بەرى ءانسامبلدىڭ كوركەمدىك جەتەكشى قىزمەتىن ق ر مادەنيەت سالاسىنىڭ ۇزدىگى سماعۇلوۆا گۇلميرا دۋبەك قىزى اتقارىپ ءجۇر.
انسامبل قۇرامىندا 24 ءبيشى، 1 باس بالەتمەيستەر، 1 ءبي دايىنداۋشى، 1 اككومپونياتور، 1 كوستيۋمەر، 1 جۇك تاسۋشى شتاتتىق بىرلىگى بار.