قۇراما جەم باعاسىن ارزانداتۋعا بيىل بيۋدجەتتەن 30 ميلليارد تەڭگە ءبولىندى
كەشە ماجىلىستە قۇراما جەم ونەركاسىبىن جاڭعىرتۋ تاقىرىبىنا ارنالعان دوڭگەلەك ۇستەل بارىسىندا اۋىل شارۋاشىلىعى ۆيتسە- ءمينيسترى ساپارحان وماروۆ وسىلاي مالىمدەدى.
ۆيتسە- ءمينيستردىڭ ايتۋىنشا، ەلىمىزدە 2006 - جىلدان باستاپ مال شارۋاشىلىعىنداعى ءىرى جانە ورتا ءوندىرىس ۇيىمدارىن ىنتالاندىرۋ، سونىڭ ىشىندە قۇراما جەمنىڭ قۇنىن ارزانداتۋ ءۇشىن ءىشىنارا سۋبسيديالاۋ باعدارلاماسى جۇزەگە اسىرىلۋدا.
«مال جانە قۇس شارۋاشىلىعىنىڭ وزىندىك قۇنى قۇرىلىمىندا 40 تان 80 پايىزعا دەيىنگى شىعىندار نەگىزىنەن ولاردىڭ ازىعىنا كەتەدى. سوندىقتان دا، قۇراما جەم وندىرەتىن كاسىپورىنداردى قولداۋ ءۇشىن مينيسترلىك تاراپىنان قۇراما جەمدى سۋبسيديالاۋ جۇزەگە اسىرىلۋدا. وسىعان وراي، جىل سايىن جەمدى ارزانداتۋ ماقساتىنا بولىنەتىن بيۋدجەتتىك قاراجات كولەمى دە ارتىپ وتىر. بيىل بۇل باعىتتا بيۋدجەتتەن 30 ميلليارد تەڭگەدەن استام قاراجات ءبولىندى. بۇل 2010 - جىلعا قاراعاندا ەكى ەسەگە ارتىق كورسەتكىش»، - دەدى ساپارحان وماروۆ.
ونىڭ ايتۋنىشا، بۇگىنگى كۇنى رەسپۋبليكا اۋماعىندا قۇراما جەم وندىرەتىن 69 كاسىپورىن جۇمىس ىستەۋدە. اتالعان كاسىپورىنداردىڭ قۇراما جەم ءوندىرۋ بويىنشا قۋاتتىلىعى جىلىنا 1,9 ميلليون توننانى قۇرايدى. بۇل رەتتە قۇراما جەم زاۋىتتارىنىڭ جۇكتەلىمى 45 پايىزعا تەڭ.
ايتا كەتەرلىگى، سوڭعى ۋاقىتتا قۇراما جەم زاۋىتتارىن قولداۋ ماسەلەسى جاندانىپ كەلەدى. ماسەلەن، 2006 -جىلدان 2014 - جىلعا دەيىن «قاز اگرو قارجى» ا ق تاراپىنان قۇراما جەم قاۋىتتارى ءۇشىن قۇرال- جابدىق ساتىپ الۋ بويىنشا جالپى قۇنى 1 ميلليارد 904,5 ميلليون تەڭگەنى قۇرايتىن 20 جوبا قارجىلاندىرىلعان.
اۆتور: قانات مامەتقازى ۇلى