الماتىدا ءوتىپ جاتقان حالىقارالىق عىلىمي فورۋمدا عالىمدار ينۆەستورلارعا 30 يننوۆاتسيالىق جوبا تانىستىردى

الماتى. قازاقپارات - بۇگىن الماتىدا «ينۆەستيتسيالىق كوپىر: عىلىم جانە بيزنەس» اتتى حالىقارالىق ديالوگ الاڭىنىڭ ەكىنشى وتىرىسى باستالدى.

ول «عىلىمعا ينۆەستيتسيا جۇمساۋ - عىلىمدى قاجەت ەتەتىن ەكونوميكانىڭ درايۆەرى» دەگەن تاقىرىپپەن ءوتىپ جاتىر. بۇل شاراعا عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ عالىمدارى، ونەرتاپقىشتار، ينۆەستيتسيالىق كومپانيالار، ونەركاسىپتىك كاسىپورىندار، بيزنەس قاۋىمداستىقتار، قارجى ينستيتۋتتارى، ۆەنچۋرلىق قورلار جانە دامۋ ينستيتۋتتارىنىڭ وكىلدەرى قاتىسۋدا.

«بۇگىنگى عىلىم مەن بيزنەس وكىلدەرىنىڭ ەكىنشى كەزدەسۋى حالىقارالىق دەڭگەيدە ءوتىپ جاتىر. وعان كورشى وزبەكستان، قىرعىزستان سەكىلدى ەلدەردىڭ عالىمدارى دا قاتىسۋدا. جالپى، ءبىزدىڭ ورتالىققا وسى ەكىنشى وتىرىسقا قاتىستى 120 استام يننوۆاتسيالىق جوبا ۇسىنىلعان بولاتىن. ءبىزدىڭ سەرىكتەس ينۆەستورلار، ساراپشىلارىمىز ولاردىڭ ىشىنەن 30 جوبانى تاڭداپ الدى. ەندى قالعان جوبالاردى دا كومەرتسيالىندىرۋ ماقساتىندا قوسىمشا جۇمىستار جۇرگىزىلەتىن بولادى. مەن مۇنىمەن نە ايتقىم كەلەدى؟ قازىرگى تاڭدا عىلىمدى قاجەت ەتەتىن ەكونوميكانى قۇرۋدا جەكە ينۆەستورلاردىڭ ءرولى وتە ۇلكەن! جوعارى دامىعان ەلدەردە عىلىمعا ينۆەستيتسيا جۇمساۋدا باستى درايۆەر مەملەكەت پەن بيۋدجەتتىك قارجى ەمەس، كورپوراتسيالار، بيزنەس ورتا، ياعني كاسىپكەرلەر! ال بۇل ءۇشىن عىلىم مەن بيزنەس اراسىندا جۇيەلى بايلانىس، ديالوگ ورناتۋ قاجەت. سوندىقتان، ءبىز بۇگىنگى ديالوگ الاڭىنىڭ ەلىمىزدە عىلىمدى قاجەت ەتەتىن ەكونومكانى قالىپتاستىرۋدا باستى ۇيىمداستىرۋ تۇعىرناماسىنا اينالادى دەگەن ۇمىتتەمىز» - دەدى ءوز سوزىندە «ۇلتتىق عىلىمي-تەحنيكالىق اقپارات ورتالىعى» ا ق پرەزيدەنتى ءادىل ىبىرايەۆ.

ايتا كەتەلىك، ۇستىمىزدەگى جىلدىڭ 18- مامىرىندا وتكەن ءبىرىنشى وتىرىستا 13 جوبا ۇسىنىلعان بولاتىن. سونىڭ ىشىندە ىلەسپە مۇناي گازىن سۇيىق سينتەتيكالىق كومىرسۋتەگىنە ايالدىرۋ جوباسى ينۆەستورلار تاراپىنان قىزىعۋشىلىق تۋدىرعان ەكەن. قازىر وسى جوبا بويىنشا ناقتى كەلىسسوزدەر جۇرگىزىلىپ جاتىر. «ال بۇگىنگى كەزدەسۋدە اسىرەسە بالاما قۋات كوزدەرىنە قاتىستى جوبالار ينۆەستورلاردىڭ قىزىعۋشىلعىن تۋدىرۋدا»، - دەيدى ماماندار.

سونىمەن قاتار، اتالمىش شارا اياسىندا ۇسىنىلعان جوبالاردىڭ كورمەسى ءوتىپ جاتىر.

عىلىم مەن بيزنەس وكىلدەرى باس قوسقان بۇگىنگى فورۋمنىڭ باستى ۇيىمداستىرۋشىسى - ق ر ب ع م «ۇلتتىق عىلىمي-تەحنيكالىق اقپارات ورتالىعى» ا ق.

اۆتور: جاپپاربەرگەن ايبوتا