رينات زايىتوۆ: «ءىزىن كورەم» ءانى ءسوزىنىڭ 30 پايىزىن جانار ءوزى قوستى - كەسكىن
«جانار ءاندى الىپ كەلگەن كەزدە ماعان ءوزى ايتادى، مىنا-مىنا سوزدەر ايتۋعا ىڭعايلى دەپ. سوندىقتان مەن جالعىز ءوزىم عانا ءاننىڭ اۆتورى ەمەسپىن. دەمەك، ءسوزىنىڭ 30 پايىزىن جانار ءوزى قوسادى. بىرىنشىدەن، ءاننىڭ ءماتىنى جەڭىل دەيتىن ەشتەڭە كورىپ تۇرعان جوقپىن. ەكىنشىدەن، ءان ءماتىنىنىڭ ءوزى سولاي بولۋى كەرەك. ءبىز ول جەرگە پوەزيا جازبايمىز عوي. سەبەبى 3 مينۋتتىڭ ىشىندە ادام ونى وقىمايدى، قاراپ قورىتا المايدى... ول ءاننىڭ نە تۋرالى ەكەنى 3 اق مينۋتتىڭ ىشىندە حالىققا جەتۋى كەرەك. بۇل جەردە بىتكەن ىسكە سىنشى كوپتىڭ» كەبىنى شىعار»، - دەيدى زايىتوۆ.
ونىڭ ايتۋىنشا، «كوپ ءسوزدىڭ جانار دوعالوۆانىڭ ءوز ورىنداۋىنا ىڭعايلانىپ جازىلعانى وتىرىك ەمەس». سونىمەن بىرگە، ول الەۋمەتتىك جەلىدە جازىلعان ءبىر سىني پىكىردى وقىپ شىققانىن ايتتى. «سول پىكىرگە بايلانىستى ايتاتىن بولسام، ول ادام ولەڭنىڭ سوزدەرىن دە، ءوزىنىڭ جازباسىن دا قاتە جازعان. ولەڭنەن كەمشىلىك ىزدەگەنشە، اۋەلى ءوزى قاتەسىز جازىپ ۇيرەنسىن، سوسىن سىناسىن»، - دەدى اقىن.
ايتا كەتەيىك، Turkvizyon-2014 بايقاۋىندا باس جۇلدە العان ءان ءسوزىنىڭ كوركەمدىك جاعىنان سىن كوتەرمەيتىنى اقپارات قۇرالدارىندا دا ايتىلعان ەدى. ءانشى جانار دوعالوۆانىڭ ءوزى بۇل جونىندە: «كوبىنەسە اۋەندى ءوزىم جازامىن. ال ءسوزى اۋەنمەن قاتار كەلەدى. سودان كەيىن اقىندارعا كورسەتىپ، بىرگە اقىلداسىپ وتىرىپ، تولىقتىرامىز، وڭدەيمىز. ءاننىڭ مۋزىكاسى مەن ءماتىنى 50/50 بولۋى كەرەك، ياعني تەڭ دارەجەدە. ءماتىننىڭ كوركەم ءارى جەڭىل، سونداي-اق ماعىنالى بولۋىنا كوپ ءمان بەرەمىن. ماسەلەن، Turkvizyon ءان بايقاۋىندا ورىنداعان «ءىزىن كورەم» ءانىنىڭ ءماتىنىن اقىن رينات زايىتوۆپەن بىرلەسىپ جازدىق. بۇل ءاندى كوپشىلىك ماقتادى، جاقسى قابىلدادى. ءساتتى شىققان دۇنيە بولدى»، - دەگەن پىكىر بىلدىرگەن.
ەسكە سالا كەتەيىك، بيىل تاتارستان استاناسىندا وتكەن Turkvizyon-2014 بايقاۋىندا جانار دوعالوۆا «ءىزىن كورەم» انىمەن 225 ۇپاي جيناپ، جەڭىمپاز اتانعان ەدى. بايقاۋدىڭ فينالىنا بارلىعى 15 ونەرپاز قاتىستى. Turkvizyon - «ەۆروۆيدەنيە» بايقاۋىنىڭ تۇركى الەمىنە ارنالعان بالاماسى. بايقاۋدىڭ اۋديتورياسى 300 ميلليون ادامنان اسادى.