قازاقستان ازاماتتارى رەسەيدە 30 كۇن بويى تىركەۋسىز بولا الادى
كەلىسىمگە سايكەس، ەكى ەل ازاماتتارى باسقا ەلگە كەلگەندە قۇزىرەتتى ورگانداردا مىندەتتى تىركەۋسىز وتىز كۇن ىشىندە بولۋىن قامتاماسىز ەتەدى. ياعني، تاراپتار اۋماعىندا قازاقستان مەن رەسەي ازاماتتارىنىڭ بولۋ ءتارتىبى وڭايلاتىلا تۇسەدى. بۇل رەتتە ازاماتتاردىڭ ۋاقىتشا بولۋ مەرزىمى كەلەتىن مەملەكەتكە كىرۋ كەزىندە شەكارالىق باقىلاۋ ورگاندارىنىڭ قويعان بەلگىسى بار كوشى- قون كارتاسىمەن راستالادى.
ال ەكى ەل اراسىندا ازاماتتاردىڭ ءبىر مەملەكەتتە بولۋى وتىز كۇننەن اسىپ كەتكەن جاعدايدا اتالعان ازامات سول مەملەكەتتىڭ زاڭناماسىنا سايكەس، قۇزىرەتتى ورگاندارىنا تىركەلۋگە مىندەتتى بولادى. «قۇجاتتى قابىلداۋ قازاقستان ازاماتتارىنىڭ رەسەيدە بولۋ ءتارتىبىن جەڭىلدەتىپ، ساۋدا- ەكونوميكالىق قارىم قاتىناستاردى جاقسارتۋعا ىقپالىن تيگىزەدى. الەۋمەتتىك ەكونوميكالىق تەرىس سالدارعا سوقتىرمايدى» ، - دەدى زاڭ جوباسى بويىنشا بايانداعان ىشكى ىستەر ءمينيسترى قالمۇحانبەت قاسىموۆ.
ءماجىلىس ماقۇلداعان قۇجات پارلامەنت سەناتىنا جولدانادى.
اۆتور: قانات مامەتقازى ۇلى