شىعىس قازاقستاندا 300 دەن استام بالانى كەنە شاقتى
ش ق و سانيتاريالىق- ەپيدەميولوگيالىق باقىلاۋ دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وڭىردە ءساۋىر ايىندا كەنە تارالۋ ماۋسىمى باستالعان. سول ۋاقىتتان باستاپ وسى كۇنگە دەيىن بارلىعى 1057 ادام كەنەدەن زارداپ شەگىپ وتىر. ونىڭ ىشىندە 327- ءسى - 14 جاسقا دەيىنگى بالالار.
«1016 ادام پروفيلاكتيكالىق ماقساتتا كەنە ەنتسەفاليتىنە قارسى يممۋنوگلوبۋلين الدى. قالعاندارى اۋرۋحاناعا كەش جۇگىنۋ، مەديتسينالىق قارسى كورسەتىلىمدەر سىندى سەبەپتەرگە بايلانىستى ەكپە العان جوق. سونداي- اق وسكەمەن قالاسىندا كەنە ەنتسەفاليتى ۆيرۋسىنا شالدىعۋدىڭ ءبىر جاعدايى تىركەلدى. ناۋقاس قازىر اۋرۋحانادا جاتىر»، - دەلىنگەن اقپاراتتا.
ايتا كەتەيىك، شىعىس قازاقستان وبلىسى رەسپۋبليكادا كەنە ەنتسەفاليتىن جۇقتىرۋ قاۋپىنىڭ «جوعارى» ايماعىنا جاتادى. وڭىردەگى گلۋبوكوە، التاي، زايسان، كاتونقاراعاي، ۇلان، شەمونايحا، سامار اۋداندارىندا جانە ريددەر، وسكەمەن قالالارىندا كەنە ەنتسەفاليتىنىڭ وشاعى كوپ.