ۆەدومستۆو ءتوراعاسىنىڭ ورىنباسارى ارداق وتەپوۆتىڭ ايتۋىنشا، سوڭعى ۋاقىتتا اۋەسقوي جانە كوممەرتسيالىق ماقساتتاعى ءاەروفوتوتۇسىرىلىم بارىسىندا جانە ءتۇرلى تاۋارلاردى جەتكىزۋ، كاسىبي تالداۋ جۇمىستارى كەزىندە پيلوتسىز ۇشۋ اپپاراتتارى كەڭىنەن قولدانىلا باستادى. درونداردى پايدالانۋشىلار قاتارى جيىلەگەن سايىن ولاردى تىركەۋ مەن ۇشۋ اپپاراتتارىن ءتيىمدى پايدالانۋ ەرەجەسى تۋرالى ماسەلە كوتەرىلۋدە.
«قازاقستاننىڭ اۆياتسيا اكىمشىلىگى ۇشۋ اپپاراتتارىن تىركەۋگە الۋ، ولاردى العاشقى دايارلىقتان وتكىزۋ جانە سەرتيفيكات بەرۋ، سونىمەن قاتار حالىق تىعىز قونىستانعان قالالىق اۋدانداردا، كەنتتەر مەن ەلدى مەكەندەردە ۇشۋعا رۇقساتناما بەرۋ جۇمىستارىن ىسكە اسىرادى»، - دەدى ارداق وتەپوۆ.
بۇگىندە ەلىمىز بويىنشا 301 پيلوتسىز ۇشۋ اپپاراتتارى ەسەپكە الىنعان. 2021-2022 -جىلدارى ۇشقىشسىز باسقارىلاتىن ۇشۋ اپپاراتتارىنا 223 سەرتيفيكات، اۆياتسيالىق جۇمىستارعا رۇقسات بەرەتىن 34 قۇجات جانە حالىق تىعىز قونىستانعان اۋدانداردا ۇشۋعا رۇقسات بەرەتىن 20 قۇجات بەرىلگەن.
بيىل قازاقستاننىڭ اۋە كەڭىستىگىن پايدالانۋ تۋرالى زاڭناماعا ءبىرقاتار تۇزەتۋ ەنگىزىلمەك. ونىڭ شەڭبەرىندە ۇشقىشسىز باسقارىلاتىن ۇشۋ اپپاراتتارىنا جاڭا تالاپتار دا قاراستىرىلعان. اتاپ ايتقاندا، پيلوتسىز ۇشۋ قۇرىلعىلارىنا ارنالعان ايماق پەن پيلوتسىز اپپاراتتاردىڭ ۇشۋىنا شەكتەۋ قوياتىن ايماق ەنگىزىلمەك.