ءۇندىستاندا ەرەۋىلگە شىققان 300 گە جۋىق ادام قاماۋعا الىندى
رەيتەر اقپارات اگەنتتىگىنىڭ حابارلاۋىنشا، پوليتسيا 300-گە جۋىق ادامدى قاماۋعا الدى. نارازىلىق اكتسيا ەلدىڭ 5 شتاتىندا ۇيىمداستىرىلدى. جەرگىلىكتى بيلىك بۇل وڭىرلەردە ينتەرنەتتى 48 ساعاتقا بۇعاتتاپ، توتەنشە جاعداي رەجيمىن جاريالادى. اشۋعا بوي الدىرعاندار ءتارتىپ ساقشىلارىنا تاس جاۋدىرىپ، كوشەدەگى كولىكتەردى ورتەي باستاعان.
پوليتسيا ولاردى تارقاتۋ ءۇشىن كوز جاساۋراتاتىن گاز بەن تاياق قولدانعان. ەكى ادامنىڭ مەرت بولعانى بەلگىلى. ءدىنارالىق جانجالدىڭ تۋىنداۋىنا ءۇندىستانداعى بيلىك پارتياسى وكىلدەرىنىڭ مۇحاممەد پايعامبارعا ءتىل تيگىزگەنى سەبەپ. ساياسي ۇيىمنىڭ ەكى وكىلى دە قىزمەتىنەن قۋىلدى. ولاردىڭ ۇستىنەن قىلمىستىق ءىس قوزعالدى. كاتار، ساۋد ارابياسى، ب ا ءا، ومان مەن يران ەلدەرى بولسا ءۇندى بيلىگىنەن كەشىرىم سۇراۋدى تالاپ ەتۋدە. ساۋدا سالاسىندا باستى سەرىكتەس سانالاتىن مۇسىلمان ەلدەرى ءۇندى تاۋارلارىنا جاپپاي بويكوت جاريالاپ جاتىر.