«مەن وسى جوبانى ۇيىمداستىرۋشىلاردىڭ ءبىرىمىن. بۇل جوبانىڭ كونسەپتسياسىن قۇرۋدان باستاپ بۇگىنگە دەيىن قانداي پروتسەستەر بولعانىن باسىنان اياعىنا دەيىن كوردىم. شىنىمەن دە، بۇل - بىرەگەي جوبا. سونداي- اق ىرىكتەۋ كەزەڭدەرى اشىق ءارى ءادىل ءوتتى. ءبىزدىڭ ءۇمىتىمىز اقتالدى، سەبەبى بۇل جوباعا قازاقستاندىق قانا ەمەس، شەتەلدىك جاستاردىڭ دا قىزىعۋشىلىعى جوعارى بولدى» ، - دەيدى اقەركە بەرلىباي.
ونىڭ ايتۋىنشا، بايقاۋ جاريالانعان كەزدە 13 مىڭنان استام ادام ءوتىنىم بەرگەن.
«7312 ادام تولىق تىركەلىپ، ءبىرىنشى كەزەڭگە ءوتتى. مىنە، وسى ادامدار جوباعا نە ماقساتپەن قاتىسىپ جاتقانىن، جوبادان نە كۇتەتىنىن انىق ءبىلدى. ال سوڭعى كەزەڭنەن سۇرىنبەي وتكەن 300 قاتىسۋشىنىڭ بولاشاعى جارقىن، سەبەبى ولار - تالانتتى، وتە اقىلدى، بىلىكتى ماماندار. مەن ولاردىڭ ءارقايسىسىن جەكە تانيمىن، سەبەبى ءارتۇرلى كەزەڭدەردە ولارمەن سويلەسىپ، سۇحبات الدىم» ، - دەيدى باسپا ءسوز حاتشىسى.
سونداي- اق، ول جوباعا مەملەكەتتىك قىزمەتشىلەر عانا قاتىسپاعانىن ايتتى.
«ىرىكتەۋدەن وتكەن 300 ادامنىڭ 96 سى عانا - مەملەكەتتىك قىزمەتشىلەر. كوبى جەكە سەكتوردان قاتىسۋشىلار. پرەزيدەنتىمىز قاسىم- جومارت توقايەۆ مەملەكەتتىك قىزمەتتىڭ اشىق بولعانىن قالاپ، قالىپتاسىپ قالعان ستەرەوتيپتەردى بۇزعىسى كەلسە، ىرىكتەلگەن 300 ادام وسى تالاپتارعا تولىق ساي كەلەدى. ولار مەملەكەتتىك قىزمەتتەگى ستەرەوتيپتەردى جويىپ، ىشىنەن مەملەكەتتىك قىزمەت سالاسىن وزگەرتەتىن جاڭا كوشباسشىلار شىعادى» ، - دەيدى ول.