30 تونناعا جۋىق: استانادا قىمىز رەكوردى تىركەلدى
استانا. KAZINFORM - قازىر استانادا قىمىز فەستيۆالى ءوتىپ جاتىر. گاستروفەستيۆالگە ەل وڭىرلەرىنەن 30 تونناعا جۋىق قىمىز اكەلىندى. ەكى كۇن ىشىندە حالىق پەن ءادىلقازى القاسى ۇزدىك قىمىزدى انىقتايدى.
- بۇگىنگى فەستيۆال اياسىندا قىمىز رەكوردىن جاڭارتىپ وتىرمىز، وسى جەرگە بۇكىل ەل اۋماعىنان 30 تونناعا جۋىق قىمىز اكەلىندى، - دەدى «BaiQymyz» ۇلتتىق تاعامدار گاستروفەستيۆالى يدەياسىنىڭ اۆتورى، ۇيىمداستىرۋشى جۇماجان قالتايەۆ.
ونىڭ ايتۋىنشا، فەستيۆالدە ۇزدىك قىمىز ءتورت ادىسپەن تاڭدالادى.
- الدىمەن كەز كەلگەن ادام قىمىزدىڭ ءدامىن كورىپ، ۇناعان قىمىزعا QR كود ارقىلى داۋىس بەرە الادى. ەكىنشى ءادىس ۇزدىك قىمىزدى ءادىلقازىلار القاسى باعالايدى. ۇشىنشىدەن، قىمىز ءوندىرۋشى ءوز ءونىمىن تانىستىرادى، ياعني پرەزەنتاتسيا جاسايدى. ءتورتىنشى ءادىس قىمىزعا لابوراتوريالىق تۇرعىدان زەرتتەلىپ، باعا بەرىلەدى، - دەيدى ول.
سونداي-اق ۇيىمداستىرۋشى قىمىز فەستيۆالىن وتكىزۋدى داستۇرگە اينالدىرۋ جوسپارى بارىن ايتتى.
- قىمىز فەستيۆالى - ىشكى جانە سىرتقى تۋريزمدى دامىتۋعا ىقپال ەتەدى دەگەن ۇمىتتەمىز، ءبىز سول ماقساتتى كوزدەپ وتىرمىز، - دەپ ءتۇسىندىردى جۇماجان قالتايەۆ.
بۇعان دەيىن حابارلاعانىمىزداي، ەلوردادا «BaiQymyz» ۇلتتىق تاعامدار گاستروفەستيۆالى ءوتىپ جاتىر.
گاستروفەستيۆالدى ۇيىمداستىرۋشىلار حالقىمىزدىڭ ءداستۇرلى تاعام مادەنيەتىن، سونىڭ ىشىندە قىمىز ءوندىرۋ ءداستۇرىن جاڭعىرتىپ، حالىقارالىق دەڭگەيگە ىلگەرىلەتۋ ماقساتىن كوزدەپ وتىر.
سونداي-اق قىمىز وندىرۋشىلەر «ەڭ ۇزدىك قىمىز» اتاعى ءۇشىن تالاسادى. جۇلدە قورى - 45 ميلليون تەڭگە (I ورىن - 20 ميلليون تەڭگە، II ورىن - 15 ميلليون تەڭگە، III ورىن - 10 ميلليون تەڭگە).
بايقاۋدىڭ ماقساتى - ەلىمىزدەگى ەڭ ساپالى ءارى شيپالى قىمىزدى انىقتاۋ.