بۇگىن 30 گرادۋس اياز: اۋا رايىنا بايلانىستى استانا تۇرعىندارىنا ەسكەرتۋ جاريالاندى
استانادا اپتانىڭ باسى ايازدان باستالدى. الداعى كۇندەرى اۋا تەمپەراتۋراسى 33 گرادۋستان تومەن تۇسەدى دەپ بولجانعان. قالا تۇرعىندارى مەن قوناقتارىنان جاراقات الۋ مەن ۇسىك شالۋ سەكىلدى قيىن جاعدايعا ۇشىراماس ءۇشىن ۇزاق ۋاقىت كوشەدە بولماۋى قاجەت، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.
قازگيدرومەت مالىمەتىنشە، 11-13-جەلتوقسان كۇندەرى اۋا تەمپەراتۋراسى تۇندە جانە كۇندىز 33- گرادۋسقا دەيىن تومەندەيدى.
«وسىعان بايلانىستى قاۋىپسىزدىك شارالارىن ساقتاۋدى ۇسىنامىز:
- داۋىل تۋرالى ەسكەرتۋلەر جاريالاعان كەزدە الىس ساپارلارعا شىقپاڭىز جانە جاياۋ جۇرمەڭىز
- اۆتوجولدارداعى اۋا رايى جاعدايلارى مەن كولىك قوزعالىسىنىڭ شەكتەۋلەرى تۋرالى اقپاراتتى قاداعالاڭىز.
- قاتتى جەل بولعان جاعدايدا جاقىن ماڭداعى عيماراتتى پانالاۋ كەرەك. اعاشتاردان، ءىلۋلى تۇرعان قۇرىلىمداردان، ەلەكتر جەلىلەرىنەن جانە بيلبوردتاردان الىس تۇرىڭىز.
- بالالاردى قاراۋسىز قالدىرماڭىز.
قاتتى اياز تەحنوگەندىك ورتتەردىڭ كوبەيۋىنە ىقپال ەتۋى مۇمكىن. وسىعان بايلانىستى ءبىز جوعارى قۋاتتى ەلەكتر قۇرىلعىلارىن ءبىر ۋاقىتتا قوسۋ ارقىلى پەشتەردى قىزدىرماۋعا نەمەسە ەلەكتر جەلىلەرىنە شامادان تىس جۇكتەمە تۇسىرمەۋ تۋرالى كەڭەس بەرەمىز.
سونداي-اق كولىك يەلەرىنە اشىق وتتىڭ كومەگىمەن اۆتوموبيلدەردى جىلىتۋ قاۋپى تۋرالى ەسكە سالامىز»، - دەپ جازىلعان حابارلامادا.