«قازىرگى ۋاقىتتا نۇر-سۇلتان قالاسىندا كوروناۆيرۋس ينفەكتسياسىنا قاتىستى 25 جاعداي تىركەلگەن. ونىڭ ىشىندە 17 جاعداي نەمەسە ناۋقاستاردىڭ 68 پايىزى - 30 بەن 49 جاس ارالىعىندا، 4 وقيعا - 50-59 جاس، 3 وقيعا - 18-29 جاس ارالىعىندا جانە ءبىر وقيعا - 14 جاستاعى جاس وسپىرىمدە كەزدەستى»، - دەدى باسقارما باسشىسى قالا اكىمدىگىندە وتكەن ونلاين بريفينگىدە.
ساۋلە قيسىقوۆانىڭ ايتۋىنشا، قازىرگى ۋاقىتتا بارلىق ناۋقاستاردىڭ جاعدايى قاناعاتتانارلىق، ەش شاعىمى جوق جانە دەنە قىزۋى شەكتى نورمادان اسپاعان.
ەسكە سالا كەتسەك، قازاقستاندا قازىر 49 كوروناۆيرۋس ينفەكتسياسىن جۇقتىرعان ادام تىركەلگەن.
«وسى ساعاتتا (20- ناۋرىز ساعات 08:30 دا) الماتىدا - 22 ادام، قاراعاندى قالاسىندا - 2 ادام، نۇر-سۇلتاندا - 25 ادام تىركەلگەن. رەسپۋبليكا اۋماعىندا بارلىعى 49 ناۋقاس تىركەلىپ وتىر. ولاردىڭ ەشقايسىسى قايتىس بولعان جوق»، - دەدى ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ.
ونىڭ ايتۋىنشا، ناۋقاستاردىڭ بارلىعىنىڭ جاعدايى جاقسى.