بالاڭىز ءتورت جاسىنا دەيىن كەمىندە 30-40 ميلليون ءسوز ەستۋ كەرەك

استانا. قازاقپارات - ەگەر بالاڭىز بولاشاقتا ادامگەرشىلىگى زور، وقۋدا وزات، سەگىز قىرلى، ءبىر سىرلى بولسىن دەسەڭىز، ءتورت جاسقا دەيىن ونىڭ جانىنان شىقپاي، بارىنشا كوپ اڭگىمەلەسۋگە تىرىسىڭىز.

سەبەبى، ماماندار بالا ءتورت جاسقا دەيىن كەم دەگەندە 30-40 ميلليون ءسوز تىڭداسا، وقىپ- بىلگەن اقپاراتىن ەستە تەز ساقتاپ، جان-جاقتى بەيىندى بولاتىنىن ايتىپ وتىر.

بۇگىن استانادا ءوتىپ جاتقان قازاقستانداعى پاتروناجدىق قىزمەتتى باعالاۋ، ونىڭ ناتيجەلەرىن تالقىلاپ، ءبىرىڭعاي مەديتسينالىق- الەۋمەتتىك قىزمەت كورسەتۋ ۇلگىسىن ازىرلەۋ جونىندەگى دوڭگەلەك ۇستەل اياسىندا BNews.kz تىلشىسىمەن اڭگىمەلەسە وتىرىپ، قازاقستانداعى ب ۇ ۇ بالالار قورىنىڭ دەنساۋلىق ساقتاۋ جانە تاماقتانۋ جونىندەگى باعدارلامالاردىڭ ۇيلەستىرۋشىسى ايگۇل نۇرعابىلوۆا وسىنداي مالىمەتتەرىمەن ءبولىستى.

«بۇگىن ءبىز قازاقستانداعى ءبىرىنشى مەديتسينالىق- سانيتارلىق كومەك دەڭگەيىندەگى پاتروناجدىق قىزمەت جۇيەسىنىڭ جۇمىسىنا جۇرگىزگەن باعالاۋىمىزدى ۇسىنىپ، ونى تالقىعا سالىپ جاتىرمىز. بۇكىل الەم بويىنشا پاتروناجدىق قىزمەتتى دامىتۋعا كوپ كوڭىل ءبولىنىپ جاتىر. سوندىقتان، ءبىز دە پاتروناجدىق مەدبيكەلەردىڭ جۇمىسى تۋرالى، ولاردىڭ بۇلدىرشىنگە تاربيە بەرۋ دەڭگەيى مەن اياعى اۋىر ايەلگە كومەك كورسەتۋ بىلىكتىلىگى تۋرالى ءبىلىپ وتىرۋىمىز كەرەك. بالانىڭ مىنەز- قۇلقىنىڭ دامۋى ءۇشىن، جالپى، بالانىڭ دامۋى ءۇشىن انا جاتىرىندا پايدا بولعان ساتتەن باستاپ، ءۇش جاسقا دەيىنگى كەزەڭ وتە ماڭىزدى ەكەنىن مەديتسينا باياعىدا- اق دالەلدەگەن.

ءدال وسى كەزەڭدە بالانىڭ الداعى ۋاقىتتا اقپاراتتى قابىلداۋ دەڭگەيى قالىپتاسادى. ەڭ باستىسى، بالا ءۇش جاسقا دەيىن قانداي قامقورلىق كورسە، قانداي دەڭگەيدە مەيىرىمگە بولەنسە، قانداي جاقسىلىق ياكي جاماندىق كورسە، بولاشاقتا ونىڭ اينالاسىنداعى اقپاراتتى قابىلداۋ دەڭگەيى، ءتىپتى، بولاشاقتاعى جۇمىسى مەن جالاقىسى سوعان بايلانىستى بولادى ەكەن. مىسالى، ءبىز جالپى ىشكى ءونىمى بىردەي باسقا ەلدەردىڭ 9-سىنىپ وقۋشىلارى مەن 9-سىنىپ وقيتىن قازاقستاندىق وقۋشىلار اراسىندا وقىعان اقپاراتتى قابىلداۋ دەڭگەيىن تەكسەردىك، وكىنىشكە قاراي، ءبىزدىڭ بالالاردىڭ اقپاراتتى قابىلداۋ دەڭگەيى تومەن بولدى»، - دەگەن ول پاتروناجدىق قىزمەت ءقازىر اتا- انا دەڭگەيىندە تاربيە بەرە الماي وتىرعانىن ايتادى.

«قاراڭىزدار، ەگەر بالا ءتورت جاسىنا دەيىن كەم دەگەندە 30-40 ميلليون ءسوز ەستىسە، ونىڭ وقىعان اقپاراتتى قابىلداۋ دەڭگەيى، قانداي دا ءبىر جاقسى قاسيەتكە قۇشتارلىعى الدەقايدا جوعارى بولادى. ال، ەگەر بالا ءتورت جاسىنا دەيىن 10 ميلليوننان كەم ءسوز ەستىسە، ونداي بالانىڭ اقپاراتتى قابىلداۋى، وقۋى كوش سوڭىندا جۇرەدى.

مىنە، وسىنىڭ بارلىعى ەلىمىزدە بالالاردىڭ دەنساۋلىعى مەن دامۋىنا وراي قولعا الىپ جاتقان شارالارمەن تىعىز بايلانىستى. سوندىقتان، پاتروناجدىق مەدبيكەنىڭ جۇمىس دەڭگەيىن، جالپى، وسى قىزمەتتى دامىتۋ زور ماڭىزعا يە. سەبەبى، وسىنداي قىزمەتكە ءزارۋ بالالارمەن تىلدەسەتىن، اتا- اناسىنا بالا كۇتىمى تۋرالى العاشقى اقپارات بەرەتىن وسى پاتروناجدىق مەدبيكەلەر. ءتىپتى، بالاعا تاماق بەرگەندە اناسى جانىندا ەمەس، قارسى الدىندا وتىرىپ، وعان كۇلە قاراپ، سويلەسىپ وتىرىپ تاماق بەرسە، بالا سونىڭ بارلىعىن ميىنا ۇمىتىلماستاي ەتىپ ساقتاپ الادى» ، - دەيدى ا. نۇرعابىلوۆا.

ونىڭ ايتۋىنشا، پاتروناجدىق مەدبيكەلەر بالا كۇتىمىنەن تىس، سول وتباسىنداعى الەۋمەتتىك جاعدايمەن تانىسىپ، ءتيىستى ورگاندارعا اقپارات بەرە الاتىنىن العا تارتتى.

كەنجەكەي توقتامۇرات