بيىل بيۋجەتتىڭ كىرىسى 3,7 تريلليون تەڭگە ۇلعايتىلماق

استانا. قازاقپارات - كولەڭكەلى ەكونوميكانىڭ ۇلەسىن قىسقارتۋ ەسەبىنەن بيىل بيۋجەتتىڭ كىرىسى 3,7 تريلليون تەڭگە ۇلعايتىلماق.

ق ر پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ۆەدومستۆونىڭ كەڭەيتىلگەن القا ماجىلىسىندە وسىنداي جوسپارىن جاريالادى، دەپ حابارلايدى قازاقپارات ءتىلشىسى.

«بىلتىر بيۋجەتتىڭ كىرىستىلىگى بويىنشا رەكوردتىق وسىمگە قول جەتكىزدىك. بيىلعى مەجە سودان اسىپ تۇسۋگە باعىتتالعان. ياعني، كىرىستى 3,7 تريلليون تەڭگەگە ۇلعايتۋ قاجەت. وسىعان بايلانىستى كولەڭكەلى ەكونوميكانىڭ ۇلەسىن قىسقارتۋ جانە سالىق-كەدەندىك اكىمشىلەندىرۋدى جەتىلدىرۋ جونىندەگى جۇمىستى جانداندىرامىز»، - دەدى ەرۇلان جاماۋبايەۆ.

مينيستر «ءبىرىڭعاي تەرەزە»، «استانا1»، «ەلەكتروندىق شوت-فاكتۋرا» سياقتى اقپاراتتىق جۇيەلەر نەگىزىندە تاۋار قوزعالىسىن قاداعالاۋدىڭ ۇلتتىق جۇيەسى جاڭعىرتىلىپ جاتقانىن اتاپ ءوتتى.

«حالىق پەن بيزنەسكە ىڭعايلى بولۋ ءۇشىن «ە-سالىق ازامات» جانە «ە-سالىق بيزنەس» سياقتى موبيلدى قوسىمشالارىمەن قامتۋدى كەڭەيتەمىز. قارجى ۇيىمدارىنا ارنالعان ەلەكتروندىق سەرۆيستەر ارقىلى قولما-قول اقشاسىز تولەمدەردىڭ سەرپىندى ءوسۋىن قامتاماسىز ەتەمىز. كەدەندىك ستاتيستيكانىڭ الشاقتىعىن تومەندەتۋ بويىنشا جۇمىستار بەلسەندى جۇرگىزىلۋدە. ول ءۇشىن نەگىزگى ساۋداداعى ارىپتەس ەلدەرمەن اقپارات الماسۋ جولعا قويىلۋدا»، - دەدى ۆەدومستۆو باسشىسى.