قىتاي قازاقستاننان 3,5 ميلليون تونناعا دەيىن استىق ساتىپ الا الادى

استانا. قازاقپارات - قىتاي قازاقستاننان 3,5 ميلليون تونناعا دەيىن استىق ساتىپ الا الادى. بۇل تۋرالى «ازىق-تۇلىك كەلىسىمشارت كورپوراتسياسى» ۇ ك» ا ق باسقارماسى ءتوراعاسىنىڭ ورىنباسارى سامات تەنبايەۆ ايتتى، دەپ حابارلايدى قازاقپارات ءتىلشىسى.

«سوڭعى 2-3 جىلدىڭ ىشىندە قازاقستاننىڭ استىق، قايتا وڭدەلگەن ءونىم ساتۋداعى ءداستۇرلى نارىعى - ورتالىق ازيادا باسەكەنىڭ كۇشەيىپ كەلە جاتقانىن بايقاپ وتىرمىز»، - دەدى ول ورتالىق كوممۋنيكاتسيالار قىزمەتىندەگى دوڭگەلەك ۇستەل وتىرىسىندا.

ونىڭ ايتۋىنشا، قازاقستان ورتالىق ازيا ەلدەرىنە جىلىنا 5 ميلليون تونناعا دەيىن استىق ەكسپورتتاپ كەلدى.

«قازىرگى ۋاقىتتا كۇشەيە تۇسكەن باسەكەلەستىككە بايلانىستى وسى جىلدىڭ ساۋىرىنەن قىتاي نارىعىن اشۋ باعىتىنداعى جۇمىس قارقىندى جۇرگىزىلىپ جاتىر. نەگىزگى تەجەۋشى ماسەلە - ينفراقۇرىلىم، وتكىزۋ مۇمكىندىگى. جارتى جىلدا شامامەن 500 مىڭ توننا استىق جونەلتىلدى. تاياۋ اراداعى مەجە - 1 ميلليون تونناعا جەتكىزۋ. قىتاي بىزدەن 3,5 ميلليون تونناعا دەيىن استىق ساتىپ الا الادى»، - دەدى سامات تەنبايەۆ.