ەلىمىزدە «ۇزدىك پەداگوگ» اتاعى يەگەرىنە 3,5 ميلليون تەڭگە سىياقى بەرىلەدى

استانا. قازاقپارات - ەلىمىزدە «ۇزدىك پەداگوگ» رەسپۋبليكالىق بايقاۋى باستالدى.

وعان مەنشىك نىسانىنا جانە ۆەدومستۆولىق باعىنىستىلىعىنا قاراماستان بارلىق مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ شتاتتىق پەداگوگ قىزمەتكەرلەرى قاتىسا الادى، دەپ حابارلايدى قازاقپارات وقۋ-اعارتۋ مينيسترلىگىنە سىلتەمە جاساپ.

اتاپ ءوتۋ كەرەك، كونكۋرس ءۇش كەزەڭنەن تۇرادى: اۋداندىق، وبلىستىق جانە رەسپۋبليكالىق. ۇمىتكەردىڭ پەداگوگيكالىق قىزمەتتە جوعارى جەتىستىكتەرى جانە كونكۋرسقا قاتىسۋ كەزىندە كەمىندە بەس جىل ۇزدىكسىز پەداگوگيكالىق تاجىريبەسى بولۋى كەرەك.

بايقاۋدىڭ ءبىرىنشى كەزەڭىنە قاتىسۋعا 1311 ءوتىنىم بەرىلگەن. قازىر اۋداندىق، قالالىق كوميسسيا ولاردىڭ پورتفوليوسىن باعالاۋ جۇمىستارىن جۇرگىزىپ جاتىر.

ەكىنشى كەزەڭدە ءار اۋدان، قالادان 100 ۇپايدىڭ 80 پايىزىنان كەم ەمەس ۇپاي جيناعان 10 قاتىسۋشى تاڭدالادى. رەسپۋبليكالىق بايقاۋدىڭ ءۇشىنشى كەزەڭى وسى جىلدىڭ قىركۇيەك ايىندا وتەدى.

رەسپۋبليكالىق كەزەڭنىڭ قورىتىندىسى بويىنشا 64 جەڭىمپاز «ۇزدىك پەداگوگ» كۋالىگىمەن، «ۇزدىك پەداگوگ» توسبەلگىسىمەن جانە 1000 ا ە ك (3450000 تەڭگە) كولەمىندە اقشالاي سىيلىقپەن ماراپاتتالادى.