تۇركيا سيريامەن شەكاراعا بيىكتىگى 3,5 مەتر قۇرايتىن بەتون قابىرعا تۇرعىزاتىن بولدى
ويتكەنى رەسمي انكارا سيريانىڭ سولتۇستىك بولىگىندە كۇرد جاساقتارىنىڭ ىقپالى ارتا تۇسكەنىنە قاتتى الاڭداۋلى. ءتىپتى تۇركيا پرەزيدەنتى تايىپ ەردوعان: «سيريانىڭ سولتۇستىگىندە، تۋرا ىرگەمىزدە جاڭا مەملەكەتتىڭ قۇرىلۋىنا رۇقسات ەتپەيمىز»، - دەپ مالىمدەپ ۇلگەرگەن.
تاياۋ شىعىس ەلدەرىنىڭ عالىمدارى اراسىندا جۇرگىزىلگەن ساۋالناما ناتيجەسى بويىنشا، قاتىسۋشىلاردىڭ % 26,8- ى بۇل وڭىردە جاڭا مەملەكەت قۇرىلۋى ءتيىس دەپ جاۋاپ بەرسە، 5,7- ى وعان ءۇزىلدى- كەسىلدى قارسىلىق بىلدىرگەن.
ومەر وزكايا، ساياساتتانۋشى:
- تاياۋ شىعىستا كۇردتەردىڭ باسىم بولىگى يراك، سيريا، تۇركيا مەن يراندا قونىس تەپكەن. ال ولارعا جاڭا مەملەكەت قۇرىپ بەرۋگە بىلەك سىبانا كىرىسكەن سىرت كۇشتەردىڭ نەگىزگى جوسپارى - وسى مەملەكەتتەردىڭ جەرىن بولىسكە سالۋ. ودان سوڭ سولتۇستىك يراك پەن سيريانىڭ سولتۇستىك ايماعىن بىرىكتىرۋ ارقىلى يراكتىڭ ەنەرگەتيكالىق رەسۋرستارىن جەرورتا تەڭىزىنە شىعارۋ بولىپ تابىلادى. مىنە، تاياۋ شىعىستاعى ادىلەتسىز سوعىس وسى قۇيتىرقى ساياساتتىڭ ەسەبىمەن جۇرگىزىلىپ كەلەدى. سول ءۇشىن تۇركيا بۇل وقيعالاردى سىرتتان باقىلاپ تۇرا المايدى، ۇلتتىق قاۋىپسىزدىگى ءۇشىن ءتيىستى شارالار جاساۋى زاڭدىلىق دەپ ەسەپتەيمىن.
ال تاياۋ شىعىستىڭ زيالى قاۋىم وكىلدەرى سيرياداعى قانتوگىستى توقتاتىپ، وڭىردە بەيبىتشىلىك پەن تۇراقتىلىقتى ورناتۋ ءۇشىن رەسمي انكارا باشار اسادتىڭ بيلىگىمەن ديپلوماتيالىق بايلانىستى جاڭعىرتىپ، كەلىسسوزگە كەلۋ قاجەتتىگىن العا تارتادى. «ەگەر اراداعى تۇيتكىل راسىمەن قارۋدىڭ كۇشىمەن شەشىلە قويسا، بۇل قاقتىعىس باقانداي 4 جىلعا سوزىلار ما ەدى»، - دەيدى ولار.
ساۆاش گەنچ، حالىقارالىق ساياساتتانۋشى:
- سيرياداعى سوعىستى سۋىق قارۋمەن توقتاتۋ مۇمكىن ەمەس. قايتا كەرىسىنشە، ەكى جاق ءبىر- بىرىنە وق جاۋدىرعان سايىن جاعداي ۋشىعىپ بارادى. مىسالى، وسىدان 2-3 جىل بۇرىن سىرتقى ساياساتتاعى سيريا- تۇركيا داعدارىسىن ۇستەل باسىندا- اق ءوزارا كەلىسىممەن شەشۋگە بولاتىن. ال قازىر ورتادا ت گ ي ل سىندى لاڭكەستىك ۇيىم بار. ەرتەڭ تاعى باسقا ەكسترەميستىك توپتىڭ پايدا بولمايتىنىنا تاعى ەشكىم كەپىل بەرە المايدى. سوندىقتان تۇركيا كورشىسىنە اسكەري وپەراتسيا جۇرگىزىپ ابىروي تاپپايدى. ەگەر ول بۇل قادامعا بارعاننىڭ وزىندە ەل ىشىندە كۇرمەۋى شەشىلمەگەن كۇرد ماسەلەسىن قايتا قوزدىرادى.
ىستامبۇل زەرتتەۋ ينستيتۋتىنىڭ ساۋالناما قورىتىندىسىنا سۇيەنسەك، تاياۋ شىعىستا تۇراقتىلىقتى ورناتۋدىڭ نەگىزگى جولى - كورشىڭمەن تاتۋ بولۋ. قاراپايىم عانا ۇسىنىس ماسەلەنىڭ ەڭ وڭاي شەشىمى سياقتى. ءبىراق ول ەكىنىڭ ءبىرىنىڭ قولىنان كەلە بەرمەيتىنىن تاراپتار دالەلدەۋدە. تۇركيا وڭتۇستىگىندەگى تىنىشسىز كورشىسىمەن ماسەلەنى تۇبەگەيلى شەشى ءۇشىن 911 شاقىرىمعا سوزىلعان سيريامەن شەكاراعا بيىكتىگى 3,5 مەتر قۇرايتىن بەتون قابىرعا تۇرعىزاتىن بولدى. ءسويتىپ ونى اراسىنان قۇس تۇگىلى، شىبىن وتپەيتىندەي تىكەن سىممەن ماتاپ، تاس قىلىپ جاۋىپ تاستاماق. سوعىلعالى تۇرعان قابىرعا كەلەشەكتە «بەرلين دۋالىنىڭ» تاعدىرىن قايتالاپ، كەيىن ورتادان الىپ تاستالا ما، الدە قىتايدىڭ تاس قامال قورعانىنداي عاسىرلار بويى ەكى ارانى اجىراتىپ تۇراتىن بولا ما، ونى تەك ۋاقىت كورسەتەدى.
www.24.kz