بيىل 3,2 مىڭ قازاقستاندىق قاجىلىققا اتتانادى
«قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز باستاعان دەلەگاتسيا ساۋد ارابياسى كورولدىگىندە (س ا ك) 2019 -جىلعى قاجىلىق ماۋسىمىنىڭ ۇيىمداستىرۋ- ۇيلەستىرۋ جۇمىستارى بويىنشا ەكى جاقتى رەسمي كەزدەسۋگە قاتىستى. اتالعان ەلدىڭ قاجىلىق جانە ۋمرا مينيسترلىگى قازاقستان قاجىلارى ءۇشىن 3200 ورىن ءبولدى» ، - دەپ حابارلايدى باسقارمانىڭ باسپا ءسوز قىزمەتى.
كەزدەسۋگە باس مۇفتيدەن بولەك، ق ر قوعامدىق دامۋ مينيسترلىگىنىڭ وكىلى، قازاقستاننىڭ جيددا قالاسىنداعى كونسۋلدىق باسشىسى جانە ازاماتتىق اۆياتسيا كوميتەتىنىڭ حالىقارالىق قاتىناستار جانە اۋە تاسىمالدارى باسقارماسىنىڭ وكىلى قاتىستى.
بيىلعى قاجىلىق ماۋسىمى تامىز ايىنا (2019 -جىلدىڭ 9 - تامىزىنان 14 - تامىزىنا دەيىن) كەلمەك. ساۋد ارابياسىنىڭ تالاپتارىنا سايكەس، جيددا مەن مەديناعا 2019 -جىلعى 4 - شىلدەدەن 5 - تامىزعا دەيىن جانە ساۋد ارابياسىنان كەرى قاراي 2019 -جىلعى 17 - تامىزدان 14 - قىركۇيەككە دەيىن ۇشۋعا بولادى.