بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ ايتتى، دەپ حابارلايدى قازاقپارات ءتىلشىسى.
«قازاقستاندا 3 مىڭنان استام قاتتى تۇرمىستىق قالدىقتار پوليگونى بار، ولاردىڭ تەك 20 پايىزى عانا نورمالارعا سايكەس. بۇل ماسەلە پاۆلودار، باتىس قازاقستان جانە سولتۇستىك قازاقستان وبلىستارىندا وتە وزەكتى بولىپ تۇر. قۇرىلىس قالدىقتارىمەن جۇمىس ىستەۋ سالاسى دا ماڭىزدى. بيىلدان باستاپ ولاردى كومۋگە تىيىم سالىندى. نورما 2016 -جىلى ەنگىزىلسە دە، قازىر تەك نۇر-سۇلتان، الماتى جانە ليساكوۆسك قالالارىندا قۇرىلىس قالدىقتارىنا ارنالعان الاڭدار بار»، - دەدى س. برەكەشەۆ ۇكىمەت وتىرىسىندا.
بەي-بەرەكەتسىز ۇيىندىلەردى جويۋ جانە بولدىرماۋ جۇمىستارى دا ءجۇرىپ جاتىر. بۇگىنگى كۇنى 7,3 مىڭ ءۇيىندىنىڭ 86 پايىزى جويىلدى. رەيدتىك شارالار ءوتىپ، 17 مىڭعا جۋىق قۇقىقبۇزۋشى جاۋاپكەرشىلىككە تارتىلىپ، 25 ميلليون تەڭگە سوماسىنا ايىپپۇل سالىنعان.
«جالپى، قوقىس شىعاراتىن ۇيىمداردىڭ قىزمەتىن رەتتەۋ جانە باقىلاۋ ماقساتىندا جاڭا ەكوكودەكستە حابارلاما جاساۋ ءتارتىبىن ەنگىزۋ كوزدەلگەن. ولار كولىككە GPS- داتچيكتەرىن ورناتۋعا جانە كولىكتىڭ قوزعالىسى تۋرالى تولىق اقپاراتتى بەرۋگە مىندەتتى. وعان قوسا، قالدىقتارمەن جۇمىس ىستەۋ تالاپتارىن بۇزعانى ءۇشىن ايىپپۇلدار (جەكە تۇلعالارعا 10 ا ە ك- تەن 50 ا ە ك- كە دەيىن) جوعارىلادى»، - دەدى ەكولوگيا ءمينيسترى.
اۆتور: ايجان سەرىكجان قىزى