بيولوگيادان حالىقارالىق وليمپيادادا قازاقستاندىق وقۋشىلار 3 كۇمىس، 1 قولا جەڭىپ الدى
19:29, 18 - شىلدە 2022
نۇر-سۇلتان. قازاقپارات - بيولوگيادان حالىقارالىق وليمپيادادا (IBO-2022) قازاقستاندىق وقۋشىلار 3 كۇمىس جانە 1 قولا مەدال جەڭىپ الدى.
بۇل تۋرالى وقۋ-اعارتۋ ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىنا جازدى، دەپ حابارلايدى قازاقپارات.
«وسىلايشا، وقۋشىلارىمىز بىلتىرعى كورسەتكىشتى جاڭارتتى. ولار وتكەن جىلى 1 كۇمىس، 2 قولا مەدال جەڭىپ العان بولاتىن.
ەريەۆاندا (ارمەنيا) وتكەن ءبىلىم جارىسىنا الەمنىڭ 64 ەلىنەن 250 وقۋشى قاتىستى.
ەلىمىزدىڭ نامىسىن نۇر-سۇلتان، الماتى جانە وسكەمەن قالالارىنان 4 وقۋشى قورعادى. ال بۇل وقۋشىنىڭ بارلىعى بەدەلدى وليمپيادانىڭ جەڭىمپازدارى اتاندى.
ۇلتتىق قۇراما قورجىنىنا ەراسىل تەمىربەكوۆ، دىنمۇحامەد ومار جانە ءاليحان جۇماعالەيەۆ كۇمىس مەدال اكەلدى. ال قولانى باقداۋلەت ەرنازاروۆ جەڭىپ الدى»، - دەگەن ۆەدومستۆو باسشىسى وقۋشىلاردى لايىقتى جەڭىستەرىمەن قۇتتىقتادى.