دۇنيەجۇزىلىك ەتنوسپورت كونفەدەراتسياسى تۇركيادا 2 مىڭ كيىز ءۇي تىگەدى
بۇل تۋرالى دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى بيلال ەردوگان كاحرامانماراشتاعى «نيەتتەستىك» اتالاتىن پالاتكالى قالاشىققا بارعان كەزدە ايتتى. قازاقپارات بۇل تۋرالى انادولىعا سىلتەمە جاساپ حابارلايدى.
«انادولىمەن» اڭگىمە بارىسىندا بيلال ەردوگان ءمالىم ەتكەندەي، دۇنيەجۇزىلىك ەتنوسپورت كونفەدەراتسياسى زارداپ شەككەندەرگە العاشقىلاردىڭ ءبىرى بولىپ كومەككە ۇمتىلىپ، ءتۇرلى ءىس- شارالاردا قولدانۋ ءۇشىن قويمالاردا تۇرعان 70 كيىز ءۇيدى ءزىلزالادان كەيىنگى العاشقى اپتادا-اق جونەلتكەن.
ونىڭ ايتۋىنشا، ءدال سول ۋاقىتتا قازاقستان مەن قىرعىزستاندا كيىز ۇيلەردى جىبەرۋ قولعا الىنىپ جاتتى.
«ءبىز تابيعي اپاتتار مەن توتەنشە جاعدايلارمەن كۇرەس جونىندەگى باسقارمانىڭ (AFAD) جەتەكشىلىگىمەن 250-گە جۋىق كيىز ءۇي قۇردىق. مۇندا قازاق جانە قىرعىز باۋىرلارىمىزبەن بىرگە ءبىزدىڭ كوماندالار دا كەلدى، ولار كيىز ءۇي قۇراۋمەن اينالىستى. مىنە، سوندىقتان دا قازاقستان مەن قىرعىزستاننىڭ تۋلارىن كەزدەستىرۋگە بولادى.
كەيىن شاتىرلار سانىن ۇلعايتۋدى ويلادىق. موڭعوليا، قازاقستان، قىرعىزستان، وزبەكستان جانە ازەربايجانمەن ىقپالداستىق شەڭبەرىندە ءتۇرلى ايماقتاردا 2 مىڭنان استام كيىز ءۇي ورناتا الامىز. ولاردىڭ ءارقايسىسى نيەتتەستىك لاگەرىنە اينالاتىن بولادى»، - دەدى بيلال ەردوگان.
دۇنيەجۇزىلىك ەتنوسپورت كونفەدەراتسياسىنان اتاپ وتكەندەي، گيۋنگورەن مۋنيتسيپاليتەتىنىڭ قولداۋىمەن گەكسۋن اۋدانىندا 100 كيىز ءۇي بوي كوتەردى. تاعى 200 ى ۋسكيۋدار مۋنيتسيپاليتەتىنىڭ قولداۋىمەن وقۋعا تۇسۋگە دايىندالىپ جاتقان ستۋدەنتتەر ءۇشىن تىگىلدى.
ايتا كەتەيىك، تۇركيادا ءالسىن-ءالسىن جەر سىلكىنىسى بۇگىنگى كۇنگە دەيىن تىركەلىپ وتىر.
جويقىن ەكى ءزىلزالا 6-اقپاندا تۇركيانىڭ كاحرامانماراش پروۆينتسياسىندا بولدى. ماگنيتۋداسى 7 بالدان استى. تەربەلىس ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا سەزىلدى. وسى تابيعي اپاتتان تۇركياعا كەلگەن شىعىن 105 ميلليارد دوللاردان استى.
تۇركيادا 6-اقپان – 31-ناۋرىز ارالىعىندا 22,5 مىڭ جەراستى ءدۇمپۋى تىركەلدى.
سوڭعى رەسمي دەرەكتەرگە سايكەس، ءزىلزالا 50096 ادامنىڭ ءومىرىن قيدى. 107204 ادام زارداپ شەكتى.
سەيسميكالىق بەلسەندىلىك ورتا ازيادا بايقالىپ جاتىر.