ەندى 2-سىنىپتا شەت ءتىلى وقىتىلماۋى مۇمكىن

استانا. قازاقپارات - 2-سىنىپ وقۋشىلارىنا ارنالعان وقۋ باعدارلاماسىنان شەت ءتىلى الىپ تاستالۋى مۇمكىن.

بۇيرىق جوباسى «اشىق ن ق ا» سايتىندا پايدا بولدى، - دەپ حابارلايدى قازاقپارات.

دايىندالعان قۇجاتتا 2023-جىلعى 1- قىركۇيەكتەن باستاپ 2-سىنىپتاردان «شەت ءتىلى» ءپانى الىپ تاستالاتىنى ايتىلعان.

10-11-سىنىپتارداعى ۇلگىلىك وقۋ جوسپارىندا وقۋ جۇكتەمەسى قىسقارۋىنا بايلانىستى «شەت ءتىلى» ءپانى بويىنشا ساعات سانى اۋىسپالى جۇكتەمە ساعاتتار ەسەبىنەن ءبىر ساعاتقا ۇلعايتىلعان.

«11 جىلدىق وقىتۋ شەڭبەرىندە وقۋ باعدارلامالارىن جەتىلدىرۋ بويىنشا جۇيەلى جۇمىس قازاقستاندىق ءبىلىم بەرۋ جۇيەسىن ءبىلىم بەرۋدىڭ حالىقارالىق ستاندارتتىق دەڭگەيىنە شىعارۋعا جانە مەكتەپ تۇلەكتەرىنە ەۋروپالىق بىلىكتىلىك شەڭبەرىنىڭ قاجەت دەڭگەيىن يگەرۋگە مۇمكىندىك بەرەدى»، - دەلىنگەن قۇجاتقا تۇسىندىرمە جازبادا.

تۇزەتۋ جوباسى 24- ساۋىرگە دەيىن قوعامدىق تالقىلاۋدا بولادى.