بۇل تۋرالى وقۋ-اعارتۋ ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات.
«بىرىنشىدەن، بۇعان دەيىن باستى نازار 3-6 جاسقا دەيىنگى بالالاردى قامتۋ بولسا، ەندى 2 جاستان باستاپ بالاباقشامەن قامتۋ مىندەتى بەكىتىلدى. بۇل باعىتتا مەكتەپكە دەيىنگى ۇيىمداردى اشۋ، ونىڭ ىشىندە اسىرەسە جەكەمەنشىك بالاباقشالارعا مەملەكەتتىك تاپسىرىستى ورنالاستىرۋ بويىنشا جۇمىس ۇيىمداستىرىلادى. قابىلدانعان شارالاردىڭ ناتيجەسىندە 2029-جىلدىڭ سوڭىنا دەيىن 2-6 جاس ارالىعىنداعى بالالار مەكتەپكە دەيىنگى تاربيەمەن جانە وقىتۋمەن 0 قامتىلادى. مەكتەپكە دەيىنگى ۇيىمداردا ورىنداردى اشۋعا ارنالعان ناقتى جوسپار ازىرلەندى. قىزمەتتەردىڭ ساپاسىن ارتتىرۋ ءۇشىن مەملەكەتتىك تاپسىرىستى ورنالاستىرۋدىڭ نورماتيۆتىك تالاپتارى كۇشەيتىلدى. مەملەكەتتىك تاپسىرىستى ورنالاستىرۋ تەتىگى «اقشا بالانىڭ سوڭىنان ەرەدى» قاعيداسىنا وزگەرتىلدى، ياعني قاراجات اتا-انا تاڭداعان بالاباقشالارعا جىبەرىلەدى»، - دەپ جازعان مينيستر.
سونداي-اق، مەكتەپكە دەيىنگى تاربيە مەن وقىتۋدىڭ جاڭا مودەلى ەنگىزىلىپ، جاڭا مەمستاندارت پەن ۇلگىلىك باعدارلامالار قابىلدانعان. ال، بالاباقشالارداعى ورىنداردى ءبولۋدىڭ ءبىرىڭعاي جانە ىڭعايلى اقپاراتتىق جۇيەسى قۇرىلماق.
«بۇل بالاباقشالارداعى ورىندارعا مونيتورينگ جۇرگىزۋگە، جىلدام ءارى ىڭعايلى كەزەككە قويۋعا، ورىنداردى ءبولۋ كەزىندە سىبايلاس جەمقورلىق تاۋەكەلدەرىن بولدىرماۋعا، بالالاردىڭ كەزەككە قايتالانىپ تۇرۋىن بولدىرماۋعا مۇمكىندىك بەرەدى. وڭىرلەردىڭ بالاباقشاعا تۇرعان كەزەگى بويىنشا دەرەكتەرى دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، قورعانىس، قۇقىق قورعاۋ مينيسترلىكتەرىنىڭ دەرەكتەر بازالارىمەن بىرىكتىرىلەدى. بالاباقشاعا كەزەككە تۇرۋ، كەزەك كەلگەننەن كەيىن بالاباقشانى تاڭداپ، جولداما الۋ قىزمەتىن egov قوسىمشاسىنان دا، بانك قوسىمشالارىنان دا الۋعا مۇمكىندىك بولادى»، - دەيدى اسحات ايماعامبەتوۆ.