الداعى 2 جىلدا الەمدەگى جاعداي ۋشىقسا، سايلاۋ وتكىزۋ قيىندايدى - دانيار اشىمبايەۆ

نۇر-سۇلتان. قازاقپارات - ساياسات تانۋشى دانيار اشىمبايەۆ پرەزيدەنت قاسىم-جومارت توقايەۆتىڭ بيىل كۇزدە مەرىزىمىنەن بۇرىن سايلاۋ وتكىزۋ تۋرالى ۇسىنىسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ونىڭ پايىمىنشا، قازىر بيلىك بابىندا تۇر. رەيتينگى ايتارلىقتاي جوعارى. مۇنى جازداعى رەفەرەندۋم كورسەتكەن.

«بيلىكتىڭ قولىندا بۇكىل كوزىر تۇرعانىمەن سىرتقى جانە ىشكى فاكتورلار الەۋمەتتىك-ەكونوميكالىق جاعدايدى ۋشىقتىرىپ بارادى. جولداۋدىڭ ءبىرىنشى بولىگىندە ۇسىنىلعان وزگەرىستەردىڭ اۋقىمدى پاكەتى ۇكىمەتتىڭ قابىلەتىنە قاتىستى ساۋال تۋىنداتادى.

ەكونوميكالىق الەۋەتتى اشا ءتۇسۋ، ەكونوميكانى ليبەرالداندىرۋ، تاريفپەن باعانى رەتتەۋ ساياساتىن قايتا قاراۋ ماسەلەسى وزەكتى. قازىرگى رەتتەۋ شارالارى ماجبۇرلىكتەن تۋىنداعانى تۇسىنىكتى. ءبىر وڭىردە باعانى تەجەپ ۇستاۋ، سونىڭ كەسىرىنەن تاۋار ءتىپتى سىرتقى نارىقتى قويىپ، وزگە وڭىرلەرگە كولەڭكەلى جولمەن كەتىپ جاتۋى ايتارلىقتاي تۇسىنىكسىز احۋال تۋىنداتادى. نارىقتى بۇكىل رەسپۋبليكا بويىنشا باعانى تەڭەستىرۋ ارقىلى عانا رەتتەۋگە بولادى. ءبىراق ونىڭ ەكونوميكالىق سالدارى بولۋى مۇمكىن. ءبىر جاعىنان بالاما جول جوق تا. جولداۋدا ۇسىنىلعان شارالار احۋالدى ورتا مەرزىمگە تۇراقتاندىرۋعا باعىتتالعان»، - دەيدى دانيار اشىمبايەۆ.

ونىڭ ايتۋىنشا، ەكونوميكاعا اسەر ەتەتىن سىرتقى فاكتورلار نەگىزىنەن ۇزاق مەرزىمدى ءارى جاعىمسىز بولىپ شىقتى.

«جازدىڭ باسىندا بۇلاي بولادى دەپ ەشكىم ويلاماعان. ۋكرايناداعى جاعداي سوزىلىپ بارادى. ا ق ش پەن قىتاي اراسىندا تەكەتىرەس كۇشەيىپ تۇر. ونىڭ ءبارى الەم نارىعىنا، قازاقستان ەكونوميكاسىنا اسەر ەتەدى. جاعدايدىڭ ۋشىعۋى 2023-2024-جىلدارعا ءدوپ كەلەتىن شىعار. ول كەزدە سايلاۋ وتكىزسەك، اۋرى تيەر ەدى. ونىڭ ۇستىنە ءدال قازىر ساياسي ساحنادا ءبىر ارناعا توعىسقان وپپوزيتسيا دا جوق. بۇكىل ۇلتتىڭ كوشباسشىسى رەتىندە پرەزيدەنتكە باسەكەلەس بولاتىن تۇلعا دا جوق. بۇل ەلدىڭ ىشكى ساياسي ومىرىنە سىرتتان ارالاسۋ مۇمكىندىگىن ازايتادى. جاھاندىق تەكەتىرەستەر ۋشىعىپ تۇرعان جاعدايدا ءىرى ويىنشىلاردىڭ كوبى باعىتى ايقىندالماعان ەلدەردىڭ از بولعانىنا مۇددەلى»، - دەيدى ساراپشى.