اقمولا جانە سولتۇستىك قازاقستان وبلىستارىن گازداندىرۋ ءۇشىن 2 نۇسقا پىسىقتالۋدا
وڭىرلەردى گازبەن تولىق قامتاماسىز ەتۋ ءۇشىن ماگيسترالدىق گاز قۇبىرىن سالۋ قاجەت. بۇل تۋرالى اقمولا وبلىسىنىڭ تۇرعىندارىمەن كەزدەسكەن ق ر ەنەرگەتيكا ءمينيسترى بولات اقشولاقوۆ مالىمەت ەتتى، دەپ حابارلايدى قازاقپارات ءتىلشىسى.
«اقمولا جانە سولتۇستىك قازاقستان وبلىستارىن گازداندىرۋ بويىنشا مينيسترلىك 2 نۇسقانى پىسىقتاۋدا. ءبىرىنشىسى، «سارىارقا» ماگيسترالدىق گاز قۇبىرىن جالعاستىرۋ. ماگيسترالدىق گاز قۇبىرىنىڭ ۇزىندىعى 298,1 كيلومەتر، بولجامدى قۇنى 182,1 ميلليارد تەڭگەنى قۇرايدى»، - دەدى بولات اقشولاقوۆ.
مينيستر اتاپ وتكەندەي، جوبانى ىسكە اسىرۋ 143 ەلدى مەكەندى نەمەسە 420 مىڭ ادامدى گازبەن قامتاماسىز ەتۋگە مۇمكىندىك بەرەدى. قازىرگى ۋاقىتتا «سارىارقا» ماگيسترالدىق گاز قۇبىرىنىڭ قۇرىلىسى. II - Ⅲ كەزەڭ.
«نۇر-سۇلتان - كوكشەتاۋ - پەتروپاۆل» ۋچاسكەسى» جوباسىنىڭ تەحنيكالىق-ەكونوميكالىق نەگىزدەمەسىن تۇزەتۋ بويىنشا جۇمىستار اياقتالىپ، مەملەكەتتىك ساراپتامانىڭ قورىتىندىسى الىندى. سونىمەن بىرگە، ەكىنشى نۇسقا رەتىندە رەسەي فەدەراتسياسىنان گازداندىرۋ ماسەلەسى قاراستىرىلۋدا.
«بۇل نۇسقا قازاقستان - رەسەي جۇمىس توبى اياسىندا ق ر جانە ر ف ەنەرگەتيكا مينيسترلىكتەرى اراسىندا بەلسەندى تالقىلانىپ جاتىر. گازدى كوممەرتسيالىق باعامەن ساتىپ العان جاعدايدا، رەسەي تاراپى ەلدىڭ سولتۇستىك جانە شىعىس وڭىرلەرىن گازداندىرۋ نۇسقالارىن قاراستىرۋعا دايىن ەكەنىن ايتۋدا. وسى ەكى نۇسقانى جان-جاقتى زەردەلەپ بارىپ، ەلدىڭ سولتۇستىك وڭىرلەرىن گازداندىرۋدىڭ تۇپكىلىكتى نۇسقاسىن ازىرلەۋ بويىنشا شارالار قابىلداناتىن بولادى»، - دەپ تولىقتىردى بولات اقشولاقوۆ.
ايتا كەتسەك، بيىل كۇزگى جيىن-تەرىن جۇمىستارىنا 423 مىڭ توننا ديزەل وتىنى بولىنگەن بولاتىن.