بويى 2 مەتر ساربازدار قىزىلوردا، تالدىقورعان، الماتىدا اسكەري بورىشىن وتەپ ءجۇر - فوتو
ۇلتتىق ۇلاننىڭ باسپا ءسوز قىزمەتى ءمالىم ەتكەنىندەي، «وڭتۇستىك» وڭىرلىك قولباسشىلىعىنا قاراستى اسكەري ءبولىم ساربازدارىنىڭ بويى ەكى مەتر بولسا، اياقكيىم ولشەمى 45-47 س م. بويدىڭ ۇزىندىعى كەدەرگى كەلتىرمەيدى. قايتا سپورتتىق نورماتيۆتەر مەن اسكەري مىندەتتەردى ورىنداۋعا، نىسانا كوزدەۋگە كومەكتەسەدى ەكەن.
سولاردىڭ ءبىرى - تالدىقورعان قالاسىنىڭ تۇلەگى، قاتارداعى جاۋىنگەر كونستانتين تاراسەنكو.
سارباز بۇگىندە قىزىلوردا قالاسىنداعى 5547-اسكەري بولىمىندە پارىزىن وتەۋدە. كونستانتيننىڭ بويى - 2 مەتر، سالماعى - 79 ك گ، اياقكيىم ولشەمى - 46.
ءوزىنىڭ ايتۋىنشا، 9-سىنىپتان كەيىن جەتىسۋ الەۋمەتتىك- گۋمانيتارلىق كوللەدجىن باعدارلاماشى ماماندىعى بويىنشا ءبىتىرىپ، تالدىقورعاندا گرافيكالىق ديزاينەر قىزمەتىن اتقارعان. ءبىر قىزىعى، اناسىنىڭ دا بويى سونداي ۇزىن ەكەن.
مەدكوميسسيادان وتكەن كەزدە بويىنىڭ ۇزىندىعىمەن تاڭعالدىرعان كونستانتين قازىر اسكەري ومىرگە ابدەن توسەلگەن. كيىمنەن دە ەش مۇقتاجدىق جوق. وعان شاق كەلەتىن كيىم قويمادا جەتكىلىكتى. توعىز اي بويى ۇلتتىق ۇلان ساپىندا جۇرگەن ك. تاراسەنكو اسكەري بورىشىن وتەۋ ءار ەر ازاماتتىڭ پارىزى دەپ سانايدى.
ەفرەيتور دياس قاسىموۆ 2002 -جىلى اقتوبە قالاسىندا دۇنيەگە كەلگەن.
دياس فۋتبول، ۆولەيبول، ءجۇزۋ جانە مۇزدا سىرعاناۋمەن اينالىسادى. 2021 -جىلى «تارلان» امۋ اقتوبە كوپسالالى كوللەدجىن فۋتبول باپكەرى ماماندىعى بويىنشا ءتامامداعان.
وتكەن جىلدىڭ ماۋسىمىندا اسكەرگە شاقىرىلىپ، تالدىقورعانداعى 5514-اسكەري بولىمىنە كەلگەن دياس ءوز قاتارلاستارىنان 2 مەتر بويىمەن جانە 45 ولشەمدى اياقكيىمىمەن ەرەكشەلەنەدى.
- بويىمنىڭ ۇزىندىعى تۇك تە قيىندىق كەلتىرمەيدى. اسكەري كيىم ماعان ارنالىپ تىگىلگەن، كەرەۋەت تە قولايلى. تاماق تانۋعا كەلسەك، ءبىز سياقتى ەرەكشەلىگى بار ساربازدارعا تاماق ەكى ەسە ارتىق كولەمدە بەرىلەدى، - دەيدى ەفرەيتور د. قاسىموۆ.
قاتارداعى جاۋىنگەر سەرىكباي قۋانىش وتكەن جىلدىڭ كۇزىندە اقتوبەدەن اسكەرگە شاقىرىلعان. الماتى قالاسىنداعى 5571-اسكەري بولىمىنە تۇسكەن الىپ سارباز - وتباسىنداعى ءۇش بالانىڭ ۇلكەنى، بويى - 205 س م، اياقكيىمى - 47. سەرىكباي قۋانىش ۇلىنىڭ مۇنداي ءىرى سۇيەكتى بولىپ تۋۋى تەگىن ەمەس. ونىڭ ءوزىنىڭ جانە ناعاشى اتالارىنىڭ بويى 2 مەتردەن اسقان ەكەن.
سەرىكبايدىڭ سوزىنە قاراعاندا، 9-سىنىپتان كەيىن ورتا ارناۋلى ءبىلىم الىپ، ساۋلەتشى ماماندىعىن مەڭگەرگەن. بالا جاسىنان سامبومەن جاتتىققاندىقتان، شىمىر بولىپ وسكەندىكتەن، اسكەري ومىرگە تەز كوندىككەن.
سەرىكباي - وسى اسكەري بولىمدەگى ەكى الىپ جاۋىنگەردىڭ ءبىرى.
قاتارداعى جاۋىنگەر الەكسەي كوۆاليەۆ 5517-اسكەري بولىمىنە پاۆلوداردان كەلگەن.
ونىڭ بويى سەرىكبايدان ءسال قالىڭقى، 1 مەتر 97 سانتيمەتر. اسكەرگە دەيىن ماشينيست كومەكشىسى ماماندىعىن الىپ ۇلگەرگەن الەكسەي وزىنەن دە ۇزىن سەرىكبايدى كورگەندە، تاڭعالعانىن ايتادى.
- بويىما ابدەن ۇيرەندىم. كوشەدەگىلەر بۇرىلىپ قاراپ، تاڭدانىس بىلدىرسە، مەن دە ولارعا كۇلە جاۋاپ بەرەمىن، - دەيدى ا. كوۆاليەۆ. مىنە، ۇلتتىق ۇلان ساپىندا وسىنداي بويى ۇزىن ساربازدار دا ەلمەن بىرگە ازاماتتىق پارىزدارىن وتەپ ءجۇر.
اۆتور: ەلجان ەرالى