قارجىلىق مونيتورينگ اگەنتتىگى كۆازي مەملەكەتتىك سەكتوردا اسا ءىرى كولەمدە قاراجات جىمقىرۋ فاكتىسى بويىنشا قىلمىستىق ءىستى تەرگەپ جاتىر.
كۇدىككە ىلىنگەن ق. س. بورانبايەۆ ۋاقىتشا ۇستاۋ يزولياتورىنا قامالدى. 17 - ناۋرىزدا سوت ونىڭ ەكى اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىنا سانكسيا بەردى. تەرگەۋ ءالى ءجۇرىپ جاتىر.
«قىلمىستىق- پروتسەسسۋالدىق كودەكستىڭ 201-بابى بويىنشا، تەرگەۋ مۇدەسىنە وراي باسقا اقپاراتتاردى جاريالاۋعا بولمايدى»، - دەپ جازىلعان اگەنتتىكتىڭ مالىمەتىندە.
Forbes.kz جازۋىنشا، قايرات بورانبايەۆ قازاقستانداعى ەڭ ىقپالدى 50 كاسىپكەردىڭ قاتارىنا كىرەدى. 2021 -جىلدىڭ قاراشاسىنداعى رەيتينگ بويىنشا ول بۇل تىزىمدە 14-ورىندا تۇر. بيزنەس باسىلىمى قايرات بورانبايەۆتى ديەۆەلوپەر، قۇرىلىس سالاسىنىڭ كاسىپكەرى، اكتيۆتەردى باسقارۋ كومپانياسىنا يەلىك ەتۋشى دەپ سيپاتتايدى.
قايرات بورانبايەۆ - ەلدىڭ ەكس- پرەزيدەنتى نازاربايەۆتىڭ قىزى داريعا نازاربايەۆانىڭ بۇرىنعى قۇداسى. بورانبايەۆتىڭ قىزى اليما بورانبايەۆا داريعانىڭ ۇلى ايسۇلتان نازاربايەۆقا (2020 -جىلى قايتىس بولعان) تۇرمىسقا شىققان. كەيىن ايسۇلتان مەن اليما اجىراسىپ كەتكەن.
اۆتور: ەسىمجان ناقتىباي