اتاۋلى كۇندەر
جۋرناليستەرگە قارسى قىلمىستاردىڭ جازاسىز قالۋىنا قارسى حالىقارالىق كۇرەس كۇنى
ب ۇ ۇ- نىڭ حالىقارالىق كۇندەرى جۇيەسىندە اتاپ وتىلەدى.
2013-جىلدىڭ 27- قاراشاسى كۇنى ب ۇ ۇ- نىڭ «جۋرناليستەردىڭ قاۋىپسىزدىگى جانە جازاسىز قالۋ پروبلەماسى» تاقىرىبىنداعى قارارى ءبىراۋىزدان ماقۇلداندى. وندا 2- قاراشا جۋرناليستەرگە قارسى قىلمىستاردىڭ جازاسىز قالۋىنا قارسى حالىقارالىق كۇرەس كۇنى رەتىندە بەلگىلەنگەن.
ەستە قالار وقيعالار
1989-جىلى العاشقى رەسپۋبليكالىق دۇنگەن قۇرىلتايشىلىق كونفەرەنسياسى ءوتتى. وندا الماتىدا دۇنگەن مادەني ورتالىعىن قۇرۋ تۋرالى شەشىم قابىلداندى. ورتالىقتىڭ العاشقى ءتوراعالارى بولىپ باكير ياحيايەۆيچ باياحۋنوۆ پەن يلياس نابيەۆيچ ۆانسۆانوۆ تاعايىندالدى.
1999-جىلى سەمەي ۋنيۆەرسيتەتىنە اقىن شاكارىم قۇدايبەردى ۇلىنىڭ ەسىمى بەرىلىپ، ۋنيۆەرسيتەت عيماراتىنىڭ الدىنا ەسكەرتكىش ورناتىلدى.
2001-جىلى وڭتۇستىك قازاقستان وبلىستىق ساياسي قۋعىن-سۇرگىن قۇرباندارى مۇراجايى اشىلدى. مۇراجايدىڭ باستى ماقساتى - قۋعىن-سۇرگىن قۇرباندارى بولعان قوعام جانە مەملەكەت قايراتكەرلەرىنىڭ ءومىرباياندارىن، سۋرەتتەرىن جيناستىرۋ.
2005-جىلى قازاقستان رەسپۋبليكاسىنىڭ وتىن-ەنەرگەتيكا كەشەنىن قارقىندى ءارى تۇراقتى دامىتۋ ءۇشىن قولايلى جاعدايلار جاساۋعا كومەكتەسۋ ماقساتىندا زاڭدى تۇلعالاردىڭ تاۋەلسىز ەرىكتى، كوممەرتسيالىق ەمەس بىرلەستىگى — «KAZENERGY» قاۋىمداستىعى قۇرىلدى.
2006-جىلى قازاقستان العاش رەت بىرىككەن ۇلتتار ۇيىمىنىڭ ەكونوميكالىق جانە الەۋمەتتىك كەڭەسىنە (ە ا ك) مۇشە بولىپ سايلاندى.
54 مۇشە مەملەكەتتەن تۇراتىن ە ا ك ب ۇ ۇ- نىڭ 14 مامانداندىرىلعان مەكەمەسىنىڭ، 10 فۋنكتسيونالدىق جانە 5 وڭىرلىك كوميسسياسىنىڭ جۇمىسىن ۇيلەستىرەدى، ب ۇ ۇ جۇيەسىنىڭ ۇيىمدارىنا جانە مۇشە-مەملەكەتتەرگە ۇسىنىس بەرەدى.
ب ۇ ۇ جارعىسىنا سايكەس ە ا ك حالىقتىڭ تۇرمىس دەڭگەيىن كوتەرۋگە كومەكتەسۋ ءۇشىن، ادامداردىڭ ەڭبەكپەن تولىق قامتىلۋىنا، ەكونوميكالىق جانە الەۋمەتتىك پروگرەسكە جاۋاپ بەرەدى.
2011-جىلى «لوكوموتيۆ كۇراستىرۋ زاۋىتى» ا ق- دا قازاقستاندىق 100-لوكوموتيۆ قۇراستىرىلدى. 0100 جول ءنومىرى بار تەپلوۆوز قازاقستان تاۋەلسىزدىگىنىڭ 20 جىلدىعىنا ارنالدى.
2012-جىلى ق ر پرەزيدەنتى نۇرسۇلتان نازاربايەۆ پەن موناكو كنيازى II البەردىڭ كەلىسسوزدەرى ناتيجەسىندە ەكى ەلدىڭ مۇددەلەرىنە ساي كەلەتىن بىرلەسكەن دەكلاراتسيا قابىلداندى.
2015-جىلى ەكسپو حالىقارالىق كورمەسىنىڭ جالاۋى استاناعا جەتتى. قازاقستانعا ايتۋلى شارانىڭ سيمۆولىن ميلاندا وتكەن ەكسپو-2015 كورمەسىندەگى قازاقستان پاۆيلونىنىڭ باس كوميسسارى انۋاربەك مۋسين اكەلدى.
ەكسپو جالاۋى ەكسپو-2015 وتكەن ميلان قالاسىنان قازاقستانعا سالتاناتتى تۇردە تابىستالعان بولاتىن.
2015 -جىلى لوندوندا ۇلى بريتانيا جانە قازاقستان رەسپۋبليكاسى ءبىلىم جانە عىلىم مينيسترلىكتەرى باسشىلىعىنىڭ قاتىسۋىمەن بريتاندىق جانە قازاقستاندىق ۋنيۆەرسيتەتتەردىڭ (UK - KazakhstanUniversitiesForum) ءبىرىنشى فورۋمى وتكىزىلدى. فورۋم باسشىلارى face-to-face فورماتىندا حالىقارالىق ءبىلىم بەرۋ باعدارلامالارىن ىسكە اسىرۋ سالاسىندا ىنتىماقتاستىق بولاشاعىن تالقىلاعان 35 قازاقستاندىق جانە 32 بريتاندىق ج و و ءۇشىن تاجىريبە الماسۋدىڭ بىرەگەي الاڭىنا اينالدى.
2016-جىلى تارازدىق شاحماتشى مادينا داۋلەتبايەۆا رەسمي تۇردە ايەلدەر گروسسمەيستەرى اتاندى.
2016-جىلى رەسەيلىك اسكەريلەر قازاقستانعا جالعا العان قىزىلقوعا اۋدانى تايسويعان پوليگونى مەن اتىراۋ وبلىسى اقجار اۋىلىنداعى جەردى قايتارىپ بەردى.
2016-جىلى قاراعاندىدا جۇلدىزدار اللەياسىندا ق ر ەڭبەك سىڭىرگەن ونەر قايراتكەرى بولات سىزدىقوۆتىڭ اتىمەن اتالعان بەلگى پايدا بولدى.
بولات سىزدىقوۆتىڭ قۇرمەتىنە قويىلعان اتاۋلى بەلگى اللەياداعى جەتىنشى بەلگى بولدى.
ب. سىزدىقوۆ ءار جىلدارى «گۇلدەر»، «اراي»، «ا-ستۋديو» توبىنىڭ انسامبلىندە ويناعان. 1992-جىلى «ميۋزيكولا» دۋەتىن قۇردى. مەملەكەت باسشىسىنىڭ 2012-جىلعى 5- جەلتوقسانداعى جارلىعىمەن ب. سىزدىقوۆقا «قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى» قۇرمەتتى اتاعى بەرىلدى.
2018-جىلى قازاقستان رەسپۋبليكاسىنىڭ ۇلتتىق بانكى كۇمىستەن جاسالعان نومينالى 5000 جانە 500 تەڭگەنى قۇرايتىن «تەڭگەگە 25 جىل» كوللەكتسيالىق تيىندارىن اينالىمعا شىعاردى.
2018-جىلى استانادا لاتىن گرافيكاسىنداعى جاڭا باسىلىمنىڭ - «ءتىل-قازىنا» رەسپۋبليكالىق اقپاراتتىق-تانىمدىق گازەتىنىڭ تۇساۋكەسەر ءراسىمى ءوتتى.
2019 -جىلى قازاقستاندىق جاس ءانشى دانەليا تولەشوۆا قازاقستاننىڭ تۋريزم ەلشىسى اتاندى. جاس دارىن ەندى رەسمي تۇردە تۋريستەردى ەلىمىزگە تارتۋعا ۇلەس قوساتىن بولادى. دانەليانى تۋريزم ەلشىسى رەتىندە سايلاۋ ءراسىمى جاستار جىلىنا وراي ەلوردادا ۇيىمداستىرىلعان «ZhasStar» فەستيۆالى كەزىندە ءوتتى.