قىزىلوردا وبلىسى پوليتسيا دەپارتامەنتى جانە جاڭاقورعان اۋداندىق پوليتسيا ءبولىمىنىڭ قىزمەتكەرلەرى «قاراسورا» جەدەل پروفيلاكتيكالىق ءىس- شاراسىن جۇرگىزدى. ونىڭ بارىسىندا اۋدانعا قاراستى كەلىنتوبە اۋىلىنىڭ كۇن باتىس جاعىنداعى قۇم اراسىنان ەكى ەسىرتكى القابى تابىلدى. ەسىرتكى ەگۋشىلەر ەلدىڭ كوزىنەن تاسا جەردەگى «قارا وي» دەگەن القاپتى تاڭداعان. وندا 20 سوتىق القاپ ارنايى دايىندالعان. پوليتسەيلەر وسى جەردەن ەرەكشە ءيسى بار جاسىل ءتۇستى 5032 ءتۇپ ءشوپتى تاركىلەدى.
«وقيعا ورنىندا ءۇش ازامات ۇستالدى. ولاردىڭ بىرەۋى - الماتى قالاسىنىڭ، ەكەۋى قىزىلوردا وبلىسىنىڭ تۇرعىندارى. كۇدىكتىلەر جاڭاقورعان اۋداندىق پوليتسيا ءبولىمىنىڭ ۋاقىتشا ۇستاۋ اباقتىسىنا قامالدى. بۇل دەرەك بويىنشا ق ر قىلمىستىق كودەكسىنىڭ 300-بابىنىڭ 2-بولىگىنىڭ 3- تارماعىمەن سوتقا دەيىنگى تەرگەپ- تەكسەرۋ امالدارى جۇرگىزىلۋدە. وندا ءىرى مولشەردە وسىرۋگە تىيىم سالىنعان وسىمدىكتەردى ەگۋ نەمەسە ءوسىرۋ نەمەسە سورانىڭ، كوكناردىڭ نەمەسە قۇرامىندا ەسىرتكى زاتتار بار باسقا دا وسىمدىكتەردىڭ سۇرىپتارىن ەگىپ- ءوسىرۋ جاعدايى كورسەتىلگەن»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتى. ەسكە سالا كەتسەك، بۇدان بۇرىن ءوزىن پوليتسيا قىزمەتكەرىمەن دەپ تانىستىرعان الاياقتىڭ قىزىلوردا تۇرعىنىنىڭ تەلەفونىن قولدى ەتكەنىن حابارلاعان بولاتىنبىز.