الماتىدا ناۋقاستارمەن بايلانىستا بولعان 2 ادامنان كوروناۆيرۋس انىقتالدى

الماتى. قازاقپارات - الماتى قالاسى تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى ايزات مولداقاسىموۆا كوروناۆيرۋسكە شالدىعۋدىڭ جاڭادان انىقتالعان جاعدايلارى تۋرالى ايتتى، دەپ حابارلايدى قازاقپارات ءتىلشىسى.

ايتا كەتەيىك، 9 -ءساۋىردىڭ وسى ۋاقىتىنا دەيىن قازاقستاندا ىندەتتى جاڭادان جۇقتىرعان 37 ادام تىركەلدى. ونىڭ ىشىندە 2 ادام الماتى قالاسىندا انىقتالدى.

«كوروناۆيرۋس جۇقتىرعان سوڭعى 2 ناۋقاسقا كەلەر بولساق، ءبىر ادام سانكت- پەتەربۋرگتەن كەلگەن ناۋقاسپەن بايلانىستا بولعان. ەكىنشىسى دە اۋىرعان اداممەن قارىم- قاتىناس جاساعان. بۇگىنگى كۇنى قالادا ستاتسيونارلىق كارانتيندە 877 ناۋقاس، ۇيدەگى كارانتيندە 5 217 ادام بار. جۇقپالى اۋرۋلار اۋرۋحاناسىندا 211 ادام، پروۆيزورلىق ستاتسيوناردا 301 ادام، كارانتين گوسپيتالىندە 388 ادام جاتىر»،- دەدى ايزات مولداقاسىموۆا ونلاين- بريفينگ بارىسىندا.

سونىمەن قاتار، ول الماتىدا كارانتين رەجيمى ەنگىزىلگەننەن بەرى كوروناۆيرۋستى جۇقتىرۋ سانى تومەندەگەنىن اتاپ ءوتتى. سوڭعى رەسمي دەرەكتەرگە سايكەس، الماتىدا COVID-19 جۇقتىرعانداردىڭ سانى - 121.