ماسكەۋدە راحىمجان وتاربايەۆتىڭ 2 كىتابىنىڭ تۇساۋى كەسىلدى
«شىڭعىس-حاننىڭ كوز جاسى» جانە «باس» اتتى روماندارى «حۋدوجەستۆەننايا ليتەراتۋرا» باسپاسىنىڭ باس رەداكتورى ۆلاديمير پرياحيننىڭ اۋدارماسىمەن ورىس تىلىندە جارىق كوردى. بۇل شاراعا ماسكەۋلىك جازۋشىلار، تىلشىلەرمەن قاتار قازاقستاننىڭ رەسەيدەگى ەلشىلىگىنىڭ وكىلدەرى جانە جازۋشىنىڭ ۇلى ەرمەرەي وتاربايەۆ قاتىستى.
ۆلاديمير پرياحين جينالعان قاۋىمعا بۇل جوبانى قازاقستان رەسپۋبليكاسىنىڭ رەسەي فەدەراتسياسىنىڭ ەلشىلىگىنىڭ قولداۋىمەن ىسكە اسىرعانىن جەتكىزىپ، العىسىن ءبىلدىردى.
ايتا كەتەلىك، وتاربايەۆتىڭ شىعارمالارى تەك قازاق جانە ورىس تىلىندە عانا ەمەس، سونىمەن قاتار فرانسۋز، قىتاي، اراب، تۇرىك، قىرعىز جانە اعىلشىن تىلدەرىنە اۋدارىلدى.
ءوز كەزەگىندە، العى ءسوز العان قازاقستاننىڭ رەسەيدەگى ەلشىلىگىنىڭ كەڭەسشى-ۋاكىلى جانار كولباچايەۆا جازۋشىنىڭ مول مۇراسى تۋرالى ايتتى.
«ءبىر-ءبىرىمىزدىڭ ادەبي شىعارمالارىمىزبەن تانىسۋ، ءوزارا تۇسىنىستىك پەن دوستىعىمىزدى جاقىنداتا تۇسەدى. وزگە حالىقتىڭ مادەنيەتىمەن تانىسۋ - ول ادامي قۇندىلىقتىڭ ەڭ جوعارى دەڭگەيىندەگى بايلانىس. راحىمجان وتاربايەۆ ءبىراز حالىقتىڭ مادەني قوسۋشىسى، ادەبي كوپىرى بولا ءبىلدى»، - دەدى جانار كولباچايەۆا.
ءىس-شارا وسى كەشتە جينالعان راحىمجان وتاربايەۆتىڭ دوستارى، ارىپتەستەرىنىڭ جازۋشى تۋرالى ەستەلىكتەرىمەن، جىلى لەبىزدەرىمەن جالعاستى. وقىرماندى شەشەندىككە تاربيەلەپ، حالقىمىزدىڭ اسىل مۇرالارىن يگەرىپ، رۋحاني تۇرعىدان دامي تۇسۋلەرىنە قىزمەت ەتەتىن قۇندى دۇنيەلەرى ءدۇيىم جۇرتقا تارايدى دەگەن سەنىم سوزدەرى ەستىلدى. بۇل جوبا جاڭاشا نەگىزىندە ۇسىنعان ەڭبەكتىڭ يدەيالاردى تاۋەلسىز ەلىمىزدىڭ جارقىن ادەبيەتىن بارشا كوركەمدىكپەن شەت ەلدەردىڭ وقىرماندارىنا تانىستىرۋ جانە قازاق مادەنيەتىنىڭ بولاشاعىنا قىزمەت ەتكىزۋ ورايىندا جاسالعان.
راحىمجان وتاربايەۆ قازاقستان جازۋشىلار وداعى باسقارماسىنىڭ مۇشەسى، قازاقستاننىڭ ەڭبەك سىڭىرگەن قايراتكەرى، ءتۇرلى حالىقارالىق سىيلىقتارمەن جانە «قۇرمەت»، «پاراسات» وردەندەرىمەن ماراپاتتالعان.