ءمولدىر 55 كەلىگە دەيىنگى جانە ابسوليۋتتى سالماق دارەجەسىندە جوعارى ماراپاتقا قول جەتكىزدى. قوس فينال دا مەرزىمىنەن بۇرىن مەكەنبايەۆانىڭ جەڭىسىمەن اياقتالدى.
«مەن امەريكاداعى جاتتىعۋ لاگەرىنە ازيا ويىندارىنا ازىرلەنۋ ءۇشىن كەلگەنمىن. وسىنداي جارىس وتەتىنىن ەستىپ، بىردەن قاتىسۋعا تىركەلدىم. جەكپە-جەكتەر وڭاي بولعان جوق. نەگىزى امەريكالىق دجيۋ-دجيتسۋ شەبەرلەرىنىڭ مىقتى ەكەنىن ءبارى بىلەدى. ءبىراق سوعان قاراماستان مەن ولاردى جەڭىپ كەتتىم، ءتىپتى ايقاس مەرزىمىنەن بۇرىن اياقتالدى. تامىز ايىنىڭ سوڭىندا يندونەزيادا وتەتىن ازياداعا دايىندىق جۇمىستارىن جالعاستىرا بەرەمىن»، - دەدى ءمولدىر مەكەنبايەۆا.
مەكەنبايەۆا سپورتتىق جارىستارعا قاتىسۋدان بولەك اكتريسالىعىمەن دە تانىمال. ول «مۇراعا بەرىلگەن ماحاببات»، «ساياحاتشى» سەكىلدى فيلمدەردە ويناعان. قازىر سپورتشى «قازاق باتىرلارى» اتتى تاريحي تەلەسەريالعا ءتۇسىپ جاتىر. ول جەردە ءمولدىر باستى ءرولدى سومدايدى.
ەسكە سالا كەتەيىك، ءمولدىر مەكەنبايەۆا بۇنىڭ الدىندا بىرىككەن اراب امىرلىكتەرىندە جانە يتاليادا وتكەن تۋرنيرلەردە التىن مەدال يەلەنگەن بولاتىن.