اتىراۋداعى رەسپۋبليكالىق ايتىستىڭ باس جۇلدەسىن 2 اقىن جەڭىپ الدى

استانا. قازاقپارات - بۇگىن اتىراۋ قالاسىندا «ۇلى دالانىڭ ۇلتتىق داستۇرلەرى» فورۋمى اياسىندا وتكەن رەسپۋبليكالىق اقىندار ايتىسىنىڭ جەڭىمپازدارى بەلگىلى بولدى، دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.

ايتا كەتەيىك، كەشە اتىراۋ وبلىسى اكىمدىگىنىڭ قولداۋىمەن رەسپبۋليكالىق اقىندار ايتىسى باستالعان بولاتىن.

قازاقستاننىڭ ءار وڭىرىنەن كەلگەن 20 اقىن باق سىناسقان بولاتىن. ايتىستىڭ قورىتىندىسى بويىنشا قاتىسقان 8 اقىنعا «شابىتتاندىرۋ» اتتى سىيلىعى بەرىلىپ، 200 مىڭ تەڭگەدەن تابىستالدى. سونىمەن قاتار، قاتىسقان 5 اقىنعا «ارنايى سىيلىق» نوميناتسياسى بويىنشا، ءار قايسىنا 400 مىڭ تەڭگەدەن تابىستالدى. 3- ورىندى يەلەنگەن مۇحتار نيازوۆ، ايبول جولماعامبەتوۆ جانە ديدار قامييەۆ 500 مىڭ تەڭگەنى قارجىعالارىنا بايلادى. ال، 2- ورىنعا جايعاسقان ورالدىق اقىن تالعات مىقي مەن قىزىلوردالىق اقىن بەكجان ءامىروۆ 750 مىڭ تەڭگەگە يە بولدى.

ايتىستىڭ قورىتىندىسى بويىنشا، باس بايگەنى اتىراۋلىق اقىن ايزادا داۋلەكەنوۆا مەن قاراعاندىلىق اقىن تىلەگەن ءادىلوۆ يە بولىپ، 3 ميلليون تەڭگەنى تەڭدەي ءبولىپ الدى.

«بۇل ايتىسقا مەن بارىمدى سالىپ دايىندالعان بولاتىنمىن. وسىنداي رەسپۋبليكالىق اقىندار ايتىسى وڭىرىمىزدە بولىپ جاتقانى بىزدەر ءۇشىن ۇلكەن مارتەبە دەپ ەسەپتەيمىن. الىدە تالاي شىڭداردى باعىندىرامىن»، - دەيدى ايزادا داۋلەكەنوۆا.