انگليادا جارىلىس: 2 ادام اۋىر حالدە جاتىر
10:19, 26 - اقپان 2018
استانا. قازاقپارات - جەكسەنبى كۇنى لەستەردەگى شاعىن ازىق-تۇلىك دۇكەنىندە بولعان قاتتى جارىلىستان التى ادام زارداپ شەكتى، دەپ حابارلايدى Telegraph.
بۇل تۋرالى انگليانىڭ شىعىس ميدلەند وڭىرىندەگى جەدەل جاردەم قىزمەتىنىڭ Twitter- دە جاريالاعان حابارلاماسىندا ايتىلعان.
«توتەنشە جاعداي بولعان جەردەن لەستەر كورولدىگى اۋرۋحاناسىنا جەتكىزىلگەن 6 ادامنىڭ 2 ۋى اۋىر حالدە»، - دەلىنگەن حابارلامادا. جارىلىس بولعان جەردە ىزدەۋ-قۇتقارۋ جۇمىستارى جۇرگىزىلىپ جاتىر.
جارىلىس سالدارىنان ەكى قاباتتى عيمارات تولىقتاي قيراعان. وسى عيماراتتىڭ ءبىرىنشى قاباتىندا ازىق-تۇلىك دۇكەنى ورنالاسقان. ت ج كەزىندە دۇكەندە نەمەسە پاتەرلەردە قانشا ادامنىڭ بولعانى ازىرگە بەلگىسىز.
Sky News تەلەارناسى قۇقىق قورعاۋ ورگاندارىنا سىلتەمە جاساپ حابارلاعانداي، تەرگەۋدىڭ الدىن الا قورىتىندىسى بويىنشا بولعان وقيعا لاڭكەستىك ارەكەتپەن بايلانىستى ەمەس.
فوتو: © EPA- EFE/TIM KEETON