قىرعىزستاندا قازاقستان قارجىسىنا سالىنىپ جاتقان 2 مەكتەپ كۇزدە پايدالانۋعا بەرىلەدى
13:26, 23 - شىلدە 2014
استانا. قازاقپارات - قىرعىزستاندا قازاقستان قارجىسىنا سالىنىپ جاتقان 2 مەكتەپ كۇزدە پايدالانۋعا بەرىلەدى. بۇل تۋرالى بۇگىن قىرعىزستاننىڭ قازاقستانداعى توتەنشە جانە وكىلەتتى ەلشىسى ەسەنگۋل ومۋراليەۆ ءمالىم ەتتى.
2012 - جىلى قىرعىزستانعا مەملەكەتتىك ساپارمەن بارعان نۇرسۇلتان نازاربايەۆ قىرعىز ەلىنە كومەك رەتىندە 2 مەكتەپ سالىپ بەرەتىندىگىن ايتقاندىعىن ەسكە سالعان ەلشى: «سودان بەرى ەكى تاراپ قاجەتتى قۇجاتتاردى دايىنداپ، وسىدان 2 اي بۇرىن بۇل ماسەلە شەشىلدى. اقشاسى ءبولىندى. قازىر ول مەكتەپتەر سالىنىپ جاتىر. ءبىرى - بىشكەكتە، ەكىنشىسى - وشتا. بۇيىرسا، كۇزگە دەيىن ول مەكتەپتەردىڭ قۇرىلىسى اياقتالىپ، پايدالانۋعا بەرىلىپ قالۋى مۇمكىن»، - دەدى.
سونىمەن قاتار ول قازاقستان مەن قىرعىزستان اياسىندا باسقا دا الەۋمەتتىك-مادەني نىساندار سالۋعا قاتىستى كەلىسىم جاسالماعاندىعىن اتاپ ءوتتى.
اۆتور: مارلان جيەمباي