«مينيسترلىك نەگىزگى ازىق-تۇلىك تاۋارلارىنىڭ 29 ءتۇرى بويىنشا تۇراقتى تۇردە مونيتورينگ جۇرگىزەدى. بۇل تىزبەنى شارتتى تۇردە ءۇش توپقا بولۋگە بولادى. ءبىرىنشى توپ - قامتاماسىز ەتىلۋى 100 جانە ودان دا كوپ پايىزدى قۇرايتىن ازىق-تۇلىك تاۋارلارى (تاۋىق جۇمىرتقاسى، كۇرىش، قوي ەتى، كارتوپ، ۇن، ماكارون جانە ت. ب.). وتاندىق وندىرۋشىلەردىڭ ءوندىرىس كولەمى جەتكىلىكتى بولعاندىقتان، بۇلارعا باسىمدىق بەرىلمەيدى»، - دەدى مينيستر پارلامەنت ماجىلىسىندەگى ۇكىمەت ساعاتىندا.
ونىڭ سوزىنە قاراعاندا، ەكىنشى توپ - قامتاماسىز ەتىلۋى 90 جانە ودان اساتىن پايىزدى قۇرايتىن ءونىم تۇرلەرى. بۇلار - ماۋسىمعا تاۋەلدى بولاتىن كوكونىس ونىمدەرى (قىزاناق، قيار، قىرىققابات، ءسابىز، باستى پياز، بۇرىش)، سيىر ەتى، شوشقا ەتى، جىلقى ەتى، قىشقىل ءسۇت ونىمدەرى، سارى ماي جانە كۇنباعىس مايى. كورسەتىلگەن ونىمدەردى جەتكىلىكتى كولەمدە وندىرەمىز، سونىمەن بىرگە از كولەمدە يمپورت تا بار.
«ءۇشىنشى توپ - قامتاماسىز ەتىلۋى 80 پايىزدان تومەن ءونىم تۇرلەرى. بۇلار - قۇس ەتى، شۇجىق ونىمدەرى، ىرىمشىك پەن سۇزبە، بالىق، الما مەن قانت. بۇل تاۋارلىق پوزيتسيالار بويىنشا يمپورت جىل سايىن 580,7 ميلليون دوللاردى نەمەسە 220 ميلليارد تەڭگەنى قۇرايدى. ولار ەكزوتيكالىق تاۋارلار ەمەس. بۇلار ءوز ەلىمىزدە وندىرىلەتىن جانە 2024-جىلعا قاراي ءوز-ءوزىمىزدى قامتاماسىز ەتۋ دەڭگەيىنە جەتكىزۋگە بولاتىن تاۋارلار. اتالعان مىندەتتەر سالا الدىنا قويىلدى، سونداي-اق Nur Otan پارتياسىنىڭ سايلاۋالدى تۇعىرناماسىندا دا كورىنىس تاپتى»، - دەدى ساپارحان وماروۆ.
وسى ورايدا ول مينيسترلىك ءسۇت، قۇس ەتىن، الما مەن قانت ءوندىرۋ كولەمىن ۇلعايتۋدى كوزدەيتىن سالالىق باعدارلامالار ازىرلەگەنىن ەسكە سالدى.