زىرياندىق بويجەتكەن قوشقاردى 29 رەت كوتەردى - فوتو
وزگە ۇلت وكىلدەرىنىڭ قاراسى قالىڭ زىريان اۋدانىندا كۇن مەن تەڭەلەتىن شۋاقتى مەرەكە - ناۋرىز جىل سايىن ەرەكشە اتالىپ وتىلەدى. جەرگىلىكتى حالىقتىڭ دا قىزىعۋشىلىعى جوعارى. اسىرەسە قوي كوتەرۋ سايىسى ءداستۇرلى تۇردە ۇيىمداستىرىلادى.
ءبىر قىزىعى، ادەتتە ەرلەر عانا قاتىساتىن جارىسقا بيىل قىز-كەلىنشەكتەر دە قىزىعۋشىلىق تانىتىپ، مەرەكەلىك شاراعا جينالعان جۇرتشىلىقتىڭ كوڭىلىن ءبىر كوتەرىپ تاستادى.
قىزداردان ورتاعا ءبىرىنشى بولىپ يۋليا مورينا شىقتى. «جاتتىعۋ زالىنا بارىپ تۇرامىن. 40 كەلىلىك شتانگامەن 15 رەت وتىرىپ-تۇرا الامىن. دەگەنمەن دە قوي - شتانگا ەمەس. سوندىقتان تولقىپ تۇرمىن»، - دەگەن ول ايتسا ايتقانداي كوتەرگەن جاندى «شتانگاسىن» قولىنان سۋسىتىپ الدى.
يۋليادان كەيىن قوي كوتەرۋ كەزەگىن العان اناستاسيا بۋرناشوۆا ءتىپتى ءبىرقاتار جىگىتتەردى شاڭ قاپتىرىپ، سەمىزدىكتى كوتەرەتىن جالعىز جانۋاردى 29 رەت كوتەردى.
«ناۋرىز مەرەكەسىن ەرەكشە جاقسى كورەمىن. الاڭعا قانداي بايقاۋ بولسا دا باعىمدى سىناپ كورەيىن دەپ كەلىپ ەدىم. قوشقار كوتەرۋ سايىسىنىڭ وتەتىندىگىن بىلگەندە باس تارتا المادىم»، - دەيدى ول.
زىريانداعى ءدامحانالاردىڭ بىرىندە داياشى بولىپ جۇمىس ىستەيتىن شىمىر بويجەتكەن بوس ۋاقىتىندا بوديبيلدينگ، پاۋەرليفتينگ جانە فيتنەسپەن شۇعىلداناتىن كورىنەدى. ال ەرلەر اراسىندا قازاقستاننىڭ ءۇش دۇركىن چەمپيونى، قالاداعى سپورت مەكتەپتەرىنىڭ ءبىرىنىڭ اۋىر اتلەتيكا بويىنشا جاتتىقتىرۋشىسى شاحمامەد ۋمۋدوۆ قارسىلاس شاق كەلتىرمەي، ءبىر مينۋتتا 42 رەت كوتەرىپ، جارىس جەڭىمپازى اتاندى.