دۇنيەگە ۇشەم اكەلگەن 29 جاستاعى انا «التىن القا» تاقتى

استانا. قازاقپارات - وڭتۇستىك قازاقستان وبلىسىنىڭ قازىعۇرت اۋىلىندا تۇراتىن قۇرالاي تاعايەۆا وبلىستاعى العاشقى ۇشەمدى دۇنيەگە الىپ كەلدى دەپ حابارلانعان وبلىس اكىمدىگىنىڭ رەسمي سايتىندا.

قازىر 29 جاستاعى كەلىنشەكتىڭ 8 بالاسى بار. ونىڭ العاشقى پەرزەنتتەرى دە ەگىز بولعان ەكەن. قۇرالايدىڭ ۇشەم بوساناتىنىن دارىگەرلەر وزىنە الدىن-الا ەسكەرتكەن. وسىعان دايىندالىپ جۇرگەن ول ءۇش قىزى - حانبيبى، جانبيبى جانە نۇربيبىگە جەڭىل بوسانعانىن ايتادى.

«التىنشى بالاعا جۇكتى بولدىم دەپ جۇرگەندە سەگىز بالانىڭ اناسى اتانعانىمدى دا بايقاماي قالدىم»، دەيدى انا.

ال العاشقى پەرزەنتتەرى ارايلىم مەن اياۋلىم دا ەگىز ەكەن.

ايتا كەتەيىك، وتكەن جىلى وبلىستا وتىزعا جۋىق ۇشەم دۇنيەگە كەلسە، ەگىزدەردىڭ سانى الپىستان اسقان. قۇزىرلى مەكەمەلەر 2013-جىلى وڭىردە 80 مىڭنان اسا ءسابي دۇنيەگە كەلگەنىن، ال 2014-جىلى بۇل كورسەتكىش تاعى بىرنەشە مىڭعا ارتقانىن ايتادى. بۇل رەسپۋبليكاداعى جوعارعى كورسەتكىش. ال ءبىر عانا قازىعۇرت اۋدانىندا جىلىنا 2 مىڭعا تارتا نارەستە دۇنيەگە كەلەتىن كورىنەدى.

«2013-جىلدىڭ قورىتىندىسىمەن اۋداندا 106 مىڭ تۇرعىن بولعان بولسا، 2015-جىلدىڭ باسىندا حالىق سانى 108 مىڭ 700 گە جەتىپ وتىر. جىل سايىن 2 مىڭ نارەستە دۇنيە ەسىگىن اشادى»، - دەيدى قازىعۇرت اۋدانىنىڭ اكىمى بولاتبەك قىستاۋوۆ.