قىزىلوردا وبلىسى پوليتسيا دەپارتامەنتى اكىمشىلىك پوليتسيا باسقارماسىنىڭ قىزمەتكەرلەرى ارمەنيا مەملەكەتىندە تىركەۋدە تۇرعان «Hyundai Sonata» اۆتوكولىگىن توقتاتتى. تەكسەرۋ بارىسىندا 42 جاستاعى جۇرگىزۋشىنىڭ كولىك قۇرالىن ەش قۇجاتسىز باسقارعانى انىقتالدى.
«ق ر اكىمشىلىك قۇقىق بۇزۋشىلىق تۋرالى كودەكسىنىڭ 230-بابى 2-بولىگىمەن اكىمشىلىك حاتتاما راسىمدەلدى. اۆتوكولىك ايىپ الاڭىنا قويىلدى. سونداي-اق كولىكتىڭ «اركان» ستاتسيونارلى جىلدامدىق ولشەگىش قۇرىلعىسىنا جىلدامدىق رەجيمىن بۇزعانى ءۇشىن 28 مارتە تۇسكەنى بەلگىلى بولدى. بۇل بويىنشا ق ر اكىمشىلىك قۇقىق بۇزۋشىلىق تۋرالى كودەكسىنىڭ 592-بابى 1- جانە 2-بولىكتەرى بويىنشا ۇيعارىم شىعارىلعان. اتالعان اۆتوكولىكتىڭ جۇرگىزۋشىسىنە 520 مىڭ 710 تەڭگە سوماسىندا ايىپپۇل سالىندى»، - دەدى دەپارتامەنتتەن.
ۆەدومستۆو مالىمەتىنشە، اۆتوكولىكتىڭ مىندەتتى ساقتاندىرۋ پوليسى جوق. قۇقىق بۇزۋشى جونىندە دەرەكتەر بازاسىندا مالىمەت تىركەلمەۋىنە بايلانىستى ايىپپۇل جونىندە دەر كەزىندە حابارلاۋعا مۇمكىندىك بولماعان.
ەسكە سالساق، بۇدان بۇرىن قىزىلوردادا 230 ك م/ساع جىلدامدىقپەن كولىك ايداعان جۇرگىزۋشى جازاعا تارتىلعان بولاتىن.